Timoteo góc toib mbioxhlas ni goyoʼ lainy toib congregación gudx Listra. Bixiosbu góc buñ griego, né xinaʼbu góc buñ judía. Xinaʼbu góc laa Eunice, né soiscólbu góc laa Loida. Layibu bisuidyibu Timoteo de Jehová desde dzú gócbu badaʼ.

Órni Pablo goyeebu Listra ni rarop buelt, biduidybu cuent que Timoteo nigolú ronladxbu herman né guirá ór gocnébu herman. Por ngú Pablo biruʼbu Timoteo ñee naniʼ xtiitz Dios né láabu. Después Pablo bisuidytzaybu Timoteo par ñacbu toib buen mextra né naniʼtzaybu diitz sacró xtuny Dios.

Rotísi goyee Pablo né Timoteo, espíritu santo golonés layibu. Toib gueʼel, Pablo bibiʼ toib visión ro bibiʼbu toib buñ ni gonab láabu ñeebu Macedonia par ñacnébu buñ lagarycu. Pablo, Timoteo, Silas né Lucas goyeeyibu goniʼyibu xtiitz Dios né gosalóyibu congregación copy lagarycu.

Lainy gudx macedonia de Tesalónica, xidal buñguieeu né buñgonaʼ gocyibu cristianos. Per tipnés buñ judíos bianladxyibu Pablo né xcompañer. Por ngú buñcu bitopyibu xidal buñ mal né bisobioyibu né goynéyibu herman nisló buñchiin. Judíos bicaʼyibu rudx: «¡Guirá buñreʼ cacalóyibu buñ ni rony mandary Roma!». Pablo né Timoteo goyoʼyibu ló riesga, por ngú bireʼyibu gueʼel né bixonyibu goyeeyibu gudx Berea.

Buñ ni golés gudx Berea náyibu nacadiagyibu diitz sacró xtuny Dios, né xidal buñ griegos né judíos gocyibu herman. Per tipnés buñ de Tesalónica bidxinyibu Berea par nagoʼyibu galrradíil. Ór cú Pablo goyee Atenas. Timoteo né Silas biaʼanyibu Berea par buny nadipyibu fe xtuny herman. Después Pablo bixelbu Timoteo ñee Tesalónica stoib par ñacnébu herman diti nareʼgan por guirá  galnagan ni goyoʼ cú. Después, Pablo bixelbu Timoteo goyee goyguen stipnés congregaciones.

Pablo gochbu Timoteo: «Ni raniiny gony ni ná Jehová sadudyibu ló xiroʼ galnagan». Timoteo godudybu ló xiroʼ galnagan né láaca goloʼ buñ láabu lachquiip por fe xtunybu. Per goyoʼ nakitbu portín bislooybu que dipa bisiambu Jehová.

Pablo gochbu buñ filipenses: «Guixela Timoteo ronoʼto. Láabu sasuidybu lóoto ximod guiento Dios né ximod guiniʼto xtiitz Dios». Pablo gopbu confianz Timoteo. Bunyibu xchiin Dios toibsi por xidal íz né galán bidzakyibu saʼyibu.