Likiiña li yônôs aa li Paul li bi mélél i Yérusalem. Nyoo, ba bi gwel nye, ba leñ nye i mok. U wada, Yésu a añle nye ikété yiinda le: ‘U ga ke i Rôma i téé likalô.’ Ba bi nyodna Paul i Yérusalem, ba kena nye i Kaisaréa, i het a bi tégbaha nwii ima i mok. Ngéda ngomin Festô a bé kéés hop wé, Paul a kal le: ‘Nwas le Kaisa a kéés me i Rôma.’ Festô a timbhe le: ‘U nkena nkaa yak Kaisa; w’a ke yak Kaisa.’ Ba jubus Paul ikété sitima i bé kenek i Rôma, bikriten biba, Lukas bo Aristarkô, ba ke ni nye.

Ikété tuye, mbuk mbebi a kahal hôñ, hala a nom ngandak dilo. Bôt bobasôna ba hoñol le ba ga wo. Ndi Paul a kal bo le: ‘A bôt, añgel i nkal me ikété eem le: “A Paul, u kon bañ woñi. W’a bol i Rôma, bôt ba yé ikété sitima lôñni we ba ga pei ki.” Lédhana! Di ga wo bé.’

Mbuk mbebi a bi hôñ 14 dilo. I mbus, hisi i nene, hi bé ôn ba nsébél le Malta. Sitima i bi léña libôñ, i bôô bipes bipes, ndi 276 i bôt i i bé mukété i bi pei. Inyu pam i nkoñ ngii (tole i ngwañ), bahogi ba bi hok, bape ba kabda bipes bi sitima bi bé leñel. Bôt ba Malta ba yoñ ngéda ni bo, ba koda ki hié le bôt ba sitima ba nohop.

Mbus sôñ aa, bisônda bi jubus Paul i sitima ipe inyu kena nye i Rôma. Ngéda a bi bol, lôk tata i lo boma nye. Kiki a ntehe bo, Paul a ti Yéhôva mayéga, nyuu i let nye. To ibale Paul a bé mut mok, a bi bana kunde i yééne i ngim ndap, sônda i téédaga nye. A bi yén nyoo nwii ima. A bé añle bôt ba bé lo i tehe nye ñañ nlam u Ane Djob, a niigaga bo njee a yé Yésu. Nyoo ki nyen Paul a bi tilna makoda ma Asia nu hiônk ni ma Yudéa bikaat. Yéhôva a bi gwélél toi Paul inyu tjam miñañ minlam ikété biloñ.