I kpɛ nsan su nga Pɔlu ɔli jasin fɛ’n i bolɛ’n, Zerizalɛmun lɔ yɛ ɔ guɛli i bo-ɔ. Kɛ ɔ juli lɔ’n, be trɛli i, kpɛkun be wlɛli i bisua. Kɔnguɛ’n, Zezi seli i aolia nun kɛ: ‘Á wá kɔ́ Rɔmun á kó bó jasin fɛ’n lɔ.’ Be fali Pɔlu Zerizalɛmun lɛ be ɔli Sezare. Ɔ dili bisua afuɛ nɲɔn lɔ. Kɛ be fɛ i ɔli Fɛstisi m’ɔ ti siefuɛ’n i ja su’n, Pɔlu seli kɛ: ‘Maan be fa min wɔ Sezaa ja su Rɔmun lɔ.’ Yɛ Fɛstisi seli i kɛ: “Ɔ waan á fá ɔ ndɛ’n kɔ́ Sezaa ja su. Ɔ maan á wá kɔ́ Sezaa ja su.” Be fali Pɔlu mmeli kun nun be ɔli Rɔmun. Liki nin Aristaki mɔ be ti i aniaan Klisifuɛ’n, be ɔli wie.

Kɛ bé kɔ́’n, aunmuan dan kpa kun kpɛli jenvie’n su, kɛ ɔ́ yó sɔ’n nn nzue’n tɔ́. Ɔ dili cɛn kpanngban. Be kwlaa be buli i kɛ be su wa wu. Sanngɛ Pɔlu seli be kɛ: “Nja mun, laliɛ nun’n anzi kun seli min kɛ: ‘Pɔlu, nán srɛ kun wɔ. Á wá jú Rɔmun lɔ, yɛ amun kwlaa nga amun o mmeli’n nun’n, amún fíte nun.’ Nán srɛ kun amun! E su wuman.”

Nzue’n tɔli lele cɛn ba blu-nin-nnan (14). I sin’n, be wunnin klɔ kun mmua lɔ. Be flɛ klɔ sɔ’n kɛ Malti. Jenvie’n sin yiɛ i. Mmeli’n ko sili jenvie’n i bo aunɲan’n su, kpɛkun i nun bubuli. Like fi w’a yoman sran ya nɲɔn ableso-nin-nsiɛn (276) nga be o mmeli’n nun’n. Be wie mun be wuɛli nzue’n, wie mun be fuli mmeli’n i buebue mun be su naan b’a kwla ju asiɛ ba’n su lɔ. Maltifuɛ mun be niannin be lika, kpɛkun be trɔli sin mannin be naan be fa yo be wun nglɛnglɛ.

Kɛ anglo nsan sinnin’n, sonja mun be fali Pɔlu mmeli uflɛ nun naan b’a fɛ i b’a wɔ Rɔmun. Kɛ be juli lɔ’n, aniaan mun be bɛli i wun wunlɛ. Kɛ Pɔlu wunnin be’n, ɔ lali Zoova i ase, kpɛkun ɔ ɲannin wunmiɛn. Kannzɛ Pɔlu ti bisuafuɛ’n, sanngɛ ɔ tran sua kun mɔ i bɔbɔ tuɛ i kalɛ’n nun, yɛ sonja kun niɛn i su. Ɔ dili afuɛ nɲɔn sua sɔ’n nun. Kɛ sran mun be bɛ i wun wunlɛ’n, ɔ kan Zezi nin Ɲanmiɛn i Famiɛn dilɛ’n be ndɛ kle be. Pɔlu klɛli fluwa ko mannin asɔnun nga be o Azi Minɛɛ nin Zide lɔ’n. Nanwlɛ, Zoova fali Pɔlu sakpa kɛ ɔ bo jasin fɛ’n nvlenvle mun be nun.