Wenyi wamuchitatu wa kwambujola cha Paulu unakahwila mu Yerusaleme. Mwemuze anakamukwachila ni kumusa mu kamenga. Mu umwe usolwelo ha ufuku, Yesu yamulweza ngwenyi: ‘Yena kumukaya ku Roma ni kwambujolako.’ Paulu yamuchiza mu Yerusaleme ni kumutwala ku Sezarea kuze alingile miaka yaali mu kamenga. Muze te ali mu cheseko kulutwe lia Mwanangana Festu, Paulu yamba ngwenyi: ‘Ngutume hanga angusopese kuli Sezare mu Roma.’ Festu yamba ngwenyi: “Hiwalikunjika kuli Sezare. Kuli Sezare mukaya.” Paulu yamusa mu ulungu uze te unayi ku Roma, nawa mandumbu aali akwa-Kristu, Luka ni Aristako yaya hamwe nenyi.

Muze te ali mu kalunga-lwiji, yalitakana ni kangonga mukolo yoze walingile matangwa anji. Ayo eswe yanyonga ngwo te kumafwa. Alioze Paulu yamba ngwenyi: ‘Malunga, umwe mungelo kangulweza mu chilota ngwenyi: ‘Paulu, kanda wivwa woma. Yena muheta ku Roma, nawa waze eswe ali mu ulungu uno, mapwa kulamwina.’ Takama! Mumu kunuchi kufwa.’

Kangonga kalingile matangwa 14. Mba ayo yamona chana. Chapwile chana cha tungu lia Melita. Ulungu yiusakaminya nawa yiupaluka mu yihanda, alioze atu eswe 276 waze apwile mu ulungu yaheta ku chana. Amwe yasana, akwo yakwata ku yihanda ya ulungu, chocho kashimbamine. Akwa-Melita yaakwasa ni kwaawikila kahia hanga ote.

Hakupalika cha tukweji atatu, maswalale yatwala Paulu ku Roma mu ulungu ukwo. Muze aheteleko, mandumbu yeza ni kulitakana nenyi. Muze aamwene, Paulu yahalisa Yehova nawa yapwa ni hamu. Chipwe ngwe Paulu kapwile funge, nihindu te kakumwecha atwame mu zuwo lia kulukala ni kumufunga kuli umwe swalale. Iye katwaminemo miaka yaali. Atu te kakwiza ni kumumeneka, nawa te kakwaambulwila hakutwala ku Wanangana wa Zambi ni kwaalongesa hakutwala kuli Yesu. Paulu nawa yasoneka mikanda ni kuyituma ku yikungulwila ya mu Azia Yikehe ni Yundeya. Kwamba pundu, Yehova kazachishile Paulu hanga atwale sango lipema kuli akwa-mavungu.