Trwazyenm vwayaz misyonner Pol ti fini Zerizalenm. Laba i ti ganny atrape e ganny met dan prizon. Dan en vizyon pandan lannwit Zezi ti dir li: ‘Ou osi devret al Ronm pour anons bon nouvel Rwayonm laba.’ Pol ti Zerizalenm e i ti ganny anmennen Sezare kot i ti pas de-z-an dan prizon. Ler i ti pe ganny zize devan Gouverner Festis, Pol ti dir: ‘Les mwan ganny zize par Sezar, Ronm.’ Festis ti dir: “Ou’n fer apel avek Sezar, ou pou al devan Sezar.” Pol ti ganny anmennen Ronm lo bato e Lik ek Aristark ti al avek li.

Ler zot ti lo lanmer, en gro tanpet ti deklare pour plizyer zour. Tou dimoun ti krwar ki zot ti pou mor. Me Pol ti dir avek bann dimoun ki ti lo bato: ‘En lanz in koz avek mwan e i’n dir mwan: “Pa bezwen per. Ou pou bezwen ariv Ronm e tou dimoun pou sen e sof.”’ Alor i ti dir zot: ‘Pran kouraz, nou pa pou mor.’

Sa tanpet ti dire pour 14 zour. Finalman zot ti vwar later. Sa ti zil Malt. Sa bato ti al kraz lo en ban disab me tou le 276 dimoun lo bato ti ariv sen e sof ater. Serten ti naze e lezot ti tyonbo bann bout dibwa ki ti’n kase avek bato e flote ziska ater. Bann dimoun lo sa zil ti fer en dife pour sof zot e zot ti pran byen swen avek zot.

Trwa mwan pli tar, bann solda ti anbark lo en lot bato avek Pol pour al Ronm. Ler i ti arive, bann frer ti vin zwenn li. Ler Pol ti vwar zot, i ti remersi Zeova e i ti pran kouraz. Menm si Pol ti en prizonnyen, i ti annan drwa reste dan en lakaz lwe kot bann solda ti vey li. I ti reste laba pour de-z-an. Dimoun ti vin vwar li e i ti pres avek zot lo Rwayonm Bondye e ansenny zot lo Zezi. Pol ti osi ekri bann let pour bann kongregasyon Lazi Miner ek Zide. Zeova ti vreman servi Pol pour pres sa bon nouvel avek dimoun lezot nasyon.