Pol ka voyazi sabanan labanna Zeruzalɛmu. U y’a minɛ yen k’a don kaso la. Sufɛ, yelifɛn dɔ la, Yezu y’a fɔ a ye ko: ‘I bena taga Ɔrɔmu ani i bena waajuli kɛ yen.’ U ye Pol minɛ ka bɔ Zeruzalɛmu ka taga n’a ye Sezare. A ye saan fila kɛ kaso la yen. Tuma min na u tun be kiti tigɛra a kan gofɛrɛnɛrɛ Fɛsitusi ɲɛɛ na, Pol y’a fɔ ko: ‘A to Ɔrɔmu masacɛ Sezari ka kiti tigɛ n’ kan.’ Fɛsitusi ko: “I m’a fɔ ko i b’a fɛ Ɔrɔmu masacɛ le ka i kiti wa? An bena taga n’i ye a fɛ.” U ye Pol don kurun dɔ kɔnɔ min tun be tagara Ɔrɔmu ani balimacɛ fila, Luka ni Arisitaraki, tagara n’a ye.

Fɔɲɔba dɔ wulila k’u to kɔgɔji kan ani a mɛɛnna tile damanin. Bɛɛ tun b’a miiri ko u bena sa. Nka Pol y’a fɔ ko: ‘Mɛlɛkɛ dɔ y’a fɔ ne ye siko la ko: “Kana siran Pol. I bena se Ɔrɔmu ani aw minw bɛɛ be kurun kɔnɔ, aw bena kisi.” A’ ye aw jaa gwɛlɛya aw tɛna sa.’

Fɔɲɔba mɛɛnna tile 14. A laban, u y’a daminɛ ka dugukolo ye yɔrɔjan. Maliti guun tun lo. Kurun tagara cɛncɛn gosi ani a karikarila. Nka, mɔgɔ 276 minw tun be kurun kɔnɔ, u bɛɛ sera dugukolo kan, foyi m’u sɔrɔ. Minw tun be jii lɔn olu donna jii kɔnɔ ka taga dugukolo kan. Tɔɔw ye kurun ka lɔgɔw minɛ ka jija n’o ye ka bɔ jii kɔnɔ. Malitikaw y’u ladon ka ɲɛ ani u ye tasuma mana walisa u k’u yɛrɛ ja.

Kalo saba o kɔ, sɔrɔdasiw ye Pol ta kurun wɛrɛ kɔnɔ ka taga n’a ye Ɔrɔmu. A senin kɔ, balimaw nana a kunbɛn. Pol y’u ye tuma min na, a ye barika la Jehova ye ani a ye jagwɛlɛya sɔrɔ. Hali ni Pol tun ye kasoden ye, u y’a to a ye boon dɔ ta luwanse la ani garadi dɔ tun b’a kɔrɔsira. Pol tora yen saan fila. Mɔgɔw tun be na bɔ a ye, a tun be Ala ka Masaya kofɔ u ye ani a tun b’u kalan Yezu koo la. Kafo minw tun be Azi mara tileben fan fɛ, ani Zude, Pol ye lɛtɛrɛw sɛbɛ o kafow ma. Tiɲɛn na, Jehova tɛmɛna Pol fɛ ka kibaro diiman jɛnsɛn siyamɔgɔw ye.