Am Schluss vo sinere dritte Predigtreis chunnt de Paulus z Jerusalem a. Dört wird er gfange gno und iigsperrt. I de Nacht seit Jesus inere Vision zu ihm: «Du wirsch uf Rom gah und dört predige.» De Paulus wird uf Cäsarea bracht und dört muess er zwei Jahr im Gfängnis bliibe. Wo er vor Gricht isch, seit er zum Statthalter Feschtus: «De Cäsar z Rom söll über mich richte.» De Feschtus git zur Antwort: «Du wetsch vom Cäsar grichtet werde, denn söllsch du au zum Cäsar gah.» Si bringed de Paulus uf es Schiff, wo uf Rom fahrt. Sini Glaubensbrüedere, de Lukas und de Aristarchus, begleited ihn.

Wo si uf em Meer sind, chömmed si in en schlimme Sturm ine. Tagelang tobet de Sturm und si meined, si müend sterbe. De Paulus beruhigt si aber: «Männer, en Engel het im Traum zu mir gseit: ‹Muesch kei Angscht ha, Paulus. Du wirsch z Rom acho und alli uf em Schiff werded grettet.› Ihr müend also kei Angscht ha! Niemer vo üs wird sterbe.»

14 Täg lang stürmts wie verruckt. Endlich gseht mer denn s Land. Es isch d Insle Malta. Im Meer usse bliibt s Schiff im Sand stecke und gheit i vil Teili usenand. Di einte schwimmed a s Land, di andere hebed sich a de kaputte Teili vom Schiff fescht und lönd sich so an Strand la triibe. Alli 276 Mensche chömmed sicher a s Land. D Lüt vo Malta kümmered sich um si und mached es Füür, dass si sich chönnd ufwärme.

Drü Mönet später bringed d Soldate de Paulus uf es anders Schiff. Wo er fascht z Rom isch, wird er a Land bracht und uf em Weg chömmed ihm d Brüedere entgege. Wo de Paulus si gseht, seit er Jehova danke und het grad wider neue Muet. De Paulus isch zwar gfange, aber er dörf z Rom imene gmietete Huus wohne. Zwei Jahr lang isch er dört und wird vomene Soldat bewacht. I dere Ziit het de Paulus vil Bsuech und er verzellt dene Mensche vo Jesus und vom Königriich vo Gott. Er schribt au Briefe a d Versammlige in Chlii-Asie und Judäa. Jehova het de Paulus würklich brucht, zum di gueti Botschaft i vilne Länder z predige.