Tü apünüintuakat nukua Pablo sünain aküjaa pütchi chajatü Jerusalén. Ataʼünüshi nia yala. Soʼu wanee ai, wanaa sümaa yalajachin nia suluʼu tü kaatsetkat, müshi Jesuu nümüin: «Oʼunajachi pia Romamüin püküjaiwa pütchi chayaa». Nuʼuninnaka Pablo Jerusalénjee suluʼumüin tü mmakat Cesarea. Piama juya chajachin püreesain nia atumawaa. Soʼu wanee kaʼi, wanaa sümaa chajachin Pablo eekai chi aluwataaikai Festo, müshi nia nümüin: «Tachuntüin toʼuninnajachin nünainmüin César süpüla niainjachin ekeraajüin takuwaʼipa». «Saaʼu puchuntüitpain niainjachin ekeraajüin pukuwaʼipa César, tajütüichipajaʼa pia nünainmüin», nümaka Festo nümüin. Nüjütünaka Pablo suluʼu wanee anuwa Romamüin. Oʼunushi nümaa Lucas otta Aristarco.

Pasanainpa naya sünain tü palaakat, antüsü nanainmüin wanee wawai. Alatüsü kojuya kaʼi süpüla shiimalaainjatüin tü wawaikat. Outajanayaa naya naaʼinruʼu. Anuu nünüiki Pablo namüin: «Waʼlemuinyuwaa, eeʼiyataashi wanee aapiee taʼlapüinruʼu sünain maa tamüin: ‹Nnojo mmoluin pia. Antajachi pia Romamüin otta napüshuaʼa na yalakana pümaa suluʼu tü anuakat, oʼttaajeena naya›. Makalaka nnojoluinjanain mmoluin jia. Nnojoleena ouktüin waya».

Sülatapa 14 kaʼi eejiraain naya sümaa tü wawaikat, antüshii naya sotpaʼamüin tü palaakat. Tü mma nantakalü aluʼumüin Malta sünülia. Atükaasü tü anuwakat sümaa sujuichijaain. Oʼttaashii napüshuaʼa na 276 wayuu sulujunakana tü anuwakat. Eejana eeka katünain sotpaʼamüin tü palaakat otta na waneinnua, oʼunajüshii süka saʼataʼata tü anuwakat. Akaaliinjünüshii naya natuma na wayuu kepiakana suluʼu tü mmakat Malta otta nachuwajaain siki süpüla naatulajüin.

Apünüin kashi süchikijee tia, oʼunushii suluʼu wanee anuwa waneinnua surulaat nümaa Pablo süpüla nantajanain Romamüin. Oʼunushii na anoujashiikana sünain anaʼlawaa nümüin Pablo nüntapa. Niʼrapa naya Pablo, atütülaasü naaʼin sümaa naapüin analuʼut nümüin Maleiwa. Mayaainjeʼe püreesain Pablo, suluʼushi nia wanee piichi anajünaka aaʼu nutuma wanee surulaat. Piama juya chajachin nia. Antawaisü tü wayuukalüirua nünainmüin Pablo otta nüküjawalin sümüin tü süchikikat Nuluwataaya Maleiwa sümaa nikirajüin naya nüchiki Jesuu. Kojuya karaloʼuta nüshajaka Pablo namüin na anoujashii chajanakana Asia Menor otta Judea. Wayaawata aaʼulu nükaaliinjünüin Pablo nutuma Jeʼwaa süpüla nüküjain tü pütchi anasükat wattapünaa maʼin.