Jelusalẹm wẹ gbejizọnlin yẹwhehodidọ tọn atọ̀ntọ Paulu tọn fó do. To finẹ, e yin wiwle sú do gànpamẹ. To numimọ de mẹ to zánmẹ, Jesu dọna ẹn dọmọ: ‘A na yì Lomu bo na dọyẹwheho to finẹ.’ Paulu yin zize sọn Jelusalẹm yì Sesalea, fihe e sẹ̀ngàn te na owhe awe. To whenue owhẹ̀ etọn to yinyin didọ to Ayimatẹn-gán Festu nukọn, e dọmọ: ‘Mì gbọ Sesali ni dawhẹna mi to Lomu.’ Festu sọ dọna ẹn dọ: “Hiẹ ko vọ́ owhẹ̀ ylọ to Sesali dè; Sesali dè wẹ hiẹ nasọ yì.” Yé sọ ze Paulu do tọjihun he jei Lomu de mẹ bọ mẹmẹsunnu awe delẹ, yèdọ Luku po Alistaku po hodo e.

Dile yé to yìyì, yujẹhọn sinsinyẹn de fọ́n to ohù lọ ji bo zindonukọn na azán susu. Mẹhe to ohún lọ mẹ lẹpo wẹ lẹndọ yé na kú janwẹ. Amọ́, Paulu dọmọ: ‘Omẹ ṣie lẹ, angẹli de dọna mi to odlọ mẹ dọ: “A dibu blo, Paulu. A na yì Lomu bọ mẹhe to ohún lọ mẹ hẹ we lẹpo nasọ gán.” Mì gboadọ! Mí ma na kú.’

Yujẹhọn lọ yìn po huhlọn po na azán 14. To godo mẹ, yé mọ ageklo de hlan. Lopo Malita tọn wẹ. Tọjihun lọ sọ slé bo gbà do flinflin, amọ́ omẹ 276 he to e mẹ lẹpo wẹ luntọ́n awuyẹyẹ-afọyẹyẹ jẹ agé ji. Mẹdelẹ lìnsin bọ mẹdevo lẹ tẹdo gbakija tọjihun lọ tọn lẹ go kaka wá agé. Mẹhe nọ nọ̀ Malita lẹ penukundo yé go bo flọ miyọ́n na yé nado hlá yozò.

To osun atọ̀n godo, awhànfuntọ lẹ ze Paulu do tọjihun devo mẹ yì Lomu. To whenue e jẹ dọ́n, mẹmẹsunnu lẹ wá pé e. Whenue Paulu mọ yé, e dopẹna Jehovah bo mọ tuli yí. Dile etlẹ yindọ gàntọ de wẹ Paulu yin, dotẹnmẹ yin nina ẹn nado haya owhé de bo nọ finẹ po gàntọ-ṣọ́tọ he to ṣiṣọ́ ẹ de po. E sọ nọ finẹ na owhe awe. Mẹlẹ nọ wá pọ́n ẹn to finẹ bọ e nọ dọyẹwheho na yé gando Ahọluduta Jiwheyẹwhe tọn go bo nọ plọnnu yé gando Jesu go. Paulu sọ kanwehlan agun Asia Pẹvi po Jude po tọn lẹ. Na nugbo tọn, Jehovah yí Paulu zan nado hẹn wẹndagbe lọ gbayipe jẹ akọta susu dè.