Paulus okwa li a ya molweendo laye laxuuninwa lokuudifa oshikando oshititatu kuJerusalem. Fimbo a li oko, okwa li a kwatwa po nokutulwa modolongo. Jesus okwa li e mu lombwela oufiku okupitila memoniko a ti: ‘Oto ka ya kuRoma u ka udife.’ Paulus okwa li a kufwa muJerusalem nokutwalwa kuKesarea, oko a ninga eedula mbali e li modolongo. Eshi Paulus a li ta pangulwa komesho yomupangeli Festus, okwa tya: ‘Nandi ka pangulwe kOmukesari kuRoma.’ Festus okwa tya kuye: ‘Molwaashi owa pula u ka pangulwe kOmukesari, oko u na okuya.’ Paulus okwa li a tumwa noshikepa kuRoma, novamwatate vavali, Lukas naAristarkus, ova li va ya pamwe naye.

Mefuta omwa li mwa tukuluka oshikungulu shinene, osho sha kwata oule womafiku mahapu. Keshe umwe okwa li ta diladila kutya otava ka fya. Opo nee Paulus okwa tya: ‘Valumenhu, onda lombwelwa komweengeli okupitila mondjodi a ti: Paulus, ino tila. Oto ka fika kuRoma, nakeshe umwe moshikepa ota ka amenwa. Kaleni mwa pama. Itatu ka fya.’

Oshikungulu osha li sha kwata omafiku 14. Hauxuuninwa ova li ve wete komutunda. Omutunda oo va li ve wete owa li onhunhu yaMelite. Oshikepa oya li ya fika komutunda ndele tai tekauka moipambu, ashike ovanhu 276 ovo va li moshikepa ova li va fika nawa komutunda. Vamwe ova li va yowa ofimbo vamwe va li va kwatelela koipambu yoshikepa ndele tava kaama va yuka komutunda. Ovanhu vomuMelite ova li ve va fila oshisho nova li va shakala omundilo opo va xuxumukwe.

Konima yeemwedi nhatu, ovakwaita ova li va twala Paulus kuRoma noshikepa imwe vali. Eshi a fika oko, ovamwatate ova li ve uya oku mu shakeneka. Eshi Paulus e va mona okwa li a pandula Jehova nokwa pamekwa. Nonande Paulus okwa li omunadolongo, okwa li a pitikwa a kale meumbo olo hali futilwa ofimbo a nangelwa komukwaita. Meumbo omo okwa kala mo eedula mbali. Ovanhu ova li have uya oku mu talela po, nokwa li he va udifile kombinga yOuhamba waKalunga noku va honga kombinga yaJesus. Paulus okwa li yo a shangela omaongalo omuAsia Linini nomuJudea eenhumwafo. Jehova okwa li a longifa shili Paulus opo a tandaveleke onghundana iwa koiwana.