Chulusalɛm Pɔɔl mɛɛlu balɔɔ yaa ndɔɔ le waŋnda yooŋgu kɛndɔɔ dimullo ni. Loŋ nda bii ndu ni, ma duau ndu o chiɛi manyumndo niŋ. Ichɔl pilɛ, mi Chiisu dimul ndu o yilaŋndo niŋ aa: ‘A cho lakɔ o lɛŋnde Luomaŋ ndeŋ niŋ, nduyɛ loŋ ŋ cho wa waŋnda yooŋgu kɛndɔɔ dimullo ni.’ Ma faŋa Pɔɔl Chulusalɛm, ma kua a ndu Sisaliaa. Nduyɛ, mbo kɔ chii loŋ wɔsilaŋ la tiɔɔŋ o chiɛi manyumndo niŋ. Mɛɛ Masa iBuŋgaa Fɛsitɔɔ wa Pɔɔl kɔɔsaa, mi Pɔɔl dimul ndu aa: ‘Hivi suɛi nii naa Siisa chua o lɛŋnde Luomaŋ ndeŋ niŋ.’ Mi Fɛsitɔɔ dimul ndu aa: “Mɛɛ ŋ yeema mi suɛi numnde kuɛ o Siisa lo yɛ, mɛɛ a cho lakɔ o Siisa lo.” Ma wou Pɔɔl o dɛndɛ mamɛŋ wa kɔlaŋ o lɛŋnde Luomaŋ ndeŋ niŋndo niŋ, nduyɛ mi puaapiliaa Kilisiɔŋnda, Luku nda Aluitakɔɔ kua a ndu latulu.

Mɛɛ nda wa kɔlaŋ o dɛndɔɔ niŋ, mi hueiyii fuku fukuei kandu hɔŋndo, nduyɛ le palɛi bɔɔbɔɔ hueiye hei wa hɔŋndo. Mi wanaa wa o dɛndɔɔ niŋnda yiyaŋ maa a cho wu. Kɛ mi Pɔɔl dimul nda aa: ‘Chaaŋaa niaa, maalikɛinɔɔ dimul la o lɔmasɔlaŋ niŋ aa: “Pɔɔl, yɔŋ isiooŋ te. A cho fuuluu o lɛŋnde Luomaŋ ndeŋ niŋ kɛndiaa, nduyɛ wanaa cho o dɛndɔɔ niŋnda kpou, nyɛ o nyɛ cho nda yɔŋnɔŋ te.” La simul kɔltaŋ! Ŋ cho wu le.’

Hueiye hei wa hɔŋndo le palɛi 14. O mɛɛlulaŋ kpɔŋ, ma fuuluu o lɛŋnde ibuŋgaleŋ Maata. Okoŋ mi dɛndɔɔ kɔɔlu, mbo pesi pesi kpou. Nduyɛ waŋnda 276 wa o dɛndɔɔ hoo niŋ ni, kɛ nyɛ o nyɛ yɔŋnuŋ nda le, ma fuuluu kɛndiaa. Mi apum del a saanaa, kɛ mi apum hini o pɛŋgɛŋ yomiɛi dɛndɔɔ choo ma hel o kɔŋgɔ. Mi wanaa wa Maata wa bii nda nyɛkɛndɛi, nduyɛ ma kiisul nda yiŋndeŋ le haŋgɔɔ.

Paŋgoŋ ŋgaa okoŋ kɔɔli, mi puaa chɔuwa wou Pɔɔl o dɛndɛ cheleŋ niŋ le kɔlaŋ o lɛŋnde Luomaŋ ndeŋ niŋ. Mɛɛ nda fuuluu, mi puaapiliaa huŋ naa ndu chua. Mɛɛ Pɔɔl che nda, mbo mel Chɛhowa balikaa, nduyɛ mbo sɔla kɔl simulaa. Mi che bɛɛ Pɔɔl wa o biyɔɔ niŋ, kɛ ma chɛl ndu le mbo nuuviaa chiɛiyo a ba ndɔ, mbo wa loŋ nduyɛ mi puaa chɔuwa wa ndu hɔlteŋ choo. Mi Pɔɔl tosa loŋ wɔsilaŋ la tiɔɔŋ. Kɛ mi waŋnda ndaa hiŋ ndu yilɔɔ, mi ndoo dimul waŋnda yooŋgu kɛndɔɔ a Masale Mɛlɛkaleŋ okɔɔ, nduyɛ mi ndoo pɛɛku nda a Chiisu okɔɔ. Mi Pɔɔl poonyiaa yaulaŋ le kundala wa Eesiaa Mainɔ a Chudiaa laŋ. Mi Chɛhowa soliŋ Pɔɔl kpeku le wanaa bɔɔbɔɔ yooŋgu kɛndɔɔ dimullo.