စီၤ​ပီလူး မၤ​ကတၢၢ်​ကွံာ်​အ​တၢ်​စံၣ်တဲၤ​တဲလီၤ​တၢ် သၢ​ဘျီတဘျီ​ဖဲ ဝ့ၢ်​ယရူၤၡလ့ၣ်​အ​ပူၤ​လီၤ. ဖဲ​န့ၣ်​န့ၣ် ပှၤ​ဖီၣ်​စီၤ​ပီလူး ဒီး​ပှၤ​ပၢ​နုာ်​အီၤ​လၢ ဃိာ်ပူၤ​လီၤ. လၢ​တၢ်ထံၣ်​လၢညါခီ ဖဲ​မုၢ်နၤ​အဆၢ​ကတီၢ်​န့ၣ် ယ့ၣ်ၡူး​တဲဘၣ်​အီၤ​လၢ– ‘န​က​ဘၣ်​လဲၤ​လၢ​ရိမ့ၤ ဒီး​စံၣ်တဲၤ​တဲလီၤ​တၢ်​ဖဲ​န့ၣ်​လီၤ.’ ပှၤ​ဆှၢလီၤ​စီၤ​ပီလူး လၢ​ကဲၤစါရံၤ ဒီး​စီၤ​ပီလူး​ဘၣ်​အိၣ်ဝဲ​လၢ ဃိာ်ပူၤ​ခံ​နံၣ်​လီၤ. ဖဲ​စီၤ​ပီလူး​လဲၤထီၣ်​ရူ​လၢ ပဒိၣ်​စီၤ​ဖ့စတူး​အမဲာ်​ညါ​အခါ အဝဲ​တဲဝဲ​လၢ– ‘ယ​အဲၣ်ဒိး​လဲၤ​လၢ ဝ့ၢ်​ရိမ့ၤ​ဒ်သိး​ကဲစၢ်​က​စံၣ်ညီၣ်​ယၤ​အဂီၢ်​လီၤ.’ ပဒိၣ်​စီၤ​ဖ့စတူး​တဲဝဲ​လၢ– ‘န​ဃ့​လဲၤ​လၢ ကဲစၢ်​အ​အိၣ်​အဃိ ပ​က​ဆှၢ​နၤ​လၢ ကဲစၢ်​အ​အိၣ်​လီၤ.’ ဒီး​ပှၤ​လဲၤ​ဆှၢ​စီၤ​ပီလူး လၢ​ကဘီ​ဆူ​ဝ့ၢ်​ရိမ့ၤ​အ​ပူၤ​လီၤ. ခရံာ်ဖိ​ခံဂၤ​လၢ​အမ့ၢ် စီၤ​လူၤကၣ်​ဒီး​စီၤ​အရံစတၢ်ဃူး​န့ၣ် လဲၤပိာ်​ဝဲ​စီၤ​ပီလူး​အခံ​လီၤ.

ဖဲ​ကဘီ​လဲၤတၢ်​လၢ ပီၣ်လဲၣ်​ပူၤ​အဆၢ​ကတီၢ်​န့ၣ် ကလံၤမုၢ်​ဖးဒိၣ်​လီၤ​လၢ အါ​သီ​အတီၢ်ပူၤ​လီၤ. လၢတၢ်န့ၣ်​အဃိ ပှၤ​ကိးဂၤ​ဒဲး​ဆိကမိၣ်​ဝဲ​လၢ အဝဲသ့ၣ်​က​သံဝဲလီၤ. ဘၣ်ဆၣ် စီၤ​ပီလူး​တဲဘၣ်​အဝဲသ့ၣ်​လၢ– ‘လၢ​တၢ်မံမီၢ်​အ​ပူၤ​န့ၣ် မူခိၣ်​ကလူး​တဂၤ​တဲဘၣ်​ယၤ​လၢ “စီၤ​ပီလူး​ဧၢ​ပျံၤတၢ်​တဂ့ၤ, ပှၤ​အိၣ်​လၢ​ကဘီ​ပူၤ​န့ၣ် က​ပူၤဖျဲး​ကိးဂၤ​ဒဲး ဒီး​န​လဲၤ​က​တုၤလၢ ဝ့ၢ်​ရိမ့ၤ​အ​ပူၤ​သပှၢ်​ကတၢၢ်​လီၤ.” အိၣ်ဒီး​တၢ်သးဒူ​သၢၣ်, ပ​တ​သံ​နီ​တဂၤ​ဘၣ်.’

ကလံၤမုၢ်​အူ​တၢ် ၁၄ သီ​ဝံၤ​အလီၢ်​ခံ ကဘီ​လဲၤ​တုၤ​ဝဲ​လၢ တၢ်လီၢ်​တတီၤ​လီၤ. တၢ်လီၢ်​အဝဲ​န့ၣ် မ့ၢ်ဝဲ​ကီး​မ့းလံတ့ၤ​လီၤ. ဖဲ​ကဘီ​လဲၤ​ဘူးထီၣ်​ဒီး​ကီး​အခါ ကဘီ​ဟးဂီၤ​ဝဲ​လီၤ. ဘၣ်ဆၣ် ပှၤအဂၤ ၂၇၆ ဂၤ​လၢ​ကဘီ​ပူၤ​န့ၣ် ပူၤဖျဲးဝဲ​လီၤ. ပှၤ​တနီၤ​န့ၣ်​ပီၢ်​ဃီၤ​ထံ​ဆူ​ထံကၢၢ်နံၤ ဒီး​အဂၤ​တနီၤ​န့ၣ် ဖီၣ်​တံၢ်​ဃာ်​ဝဲ​ကဘီ အက့​အဃိ ထီၣ်​ဖီ​ဝဲ​လၢ​ထံဖီခိၣ်​ဒီး ကယီ​ကယီ​န့ၣ်​အဝဲသ့ၣ်​စ့ၢ်ကီး တုၤ​ဃီၤ​လၢ​ထံကၢၢ်နံၤ​အ​ကပၤ​လီၤ. ပှၤ​အိၣ်​လၢ ကီး​မ့းလံတ့ၤ​အ​ပူၤ​န့ၣ် ကွၢ်ထွဲ​အဝဲသ့ၣ် ဒီး​မၤ​ကဲၤထီၣ်​န့ၢ်​အဝဲသ့ၣ် မ့ၣ်အူ​ဒ်သိး​က​မၤ​က​လၢၤ​ထီၣ် အဝဲသ့ၣ်​အဂီၢ်​လီၤ.

သၢ​လါ​ဝံၤ​အလီၢ်​ခံ သုးဖိတဖၣ်​လဲၤ​ကိးဝဲ​စီၤ​ပီလူး ဆူ​ရိမ့ၤ​လၢ​ကဘီ​အဂၤ​တဘ့ၣ်​လီၤ. ဖဲ​စီၤ​ပီလူး​လဲၤ​တုၤလၢ​ရိမ့ၤ​အခါ ဒီပုၢ်ဝဲၢ်​တဖၣ် ဟဲ​ထံၣ်​လိာ်သး​ဒီး​အီၤ​လီၤ. ခီဖျိ​လၢ စီၤ​ပီလူး​ထံၣ်ဘၣ်​အဝဲသ့ၣ်​အဃိ အဝဲ​စံးဘျုး​စံးဖှိၣ်​က့ၤ ယဟိဝၤ​ယွၤ ဒီး​အသး​ဆူၣ်​ထီၣ်ဝဲ​လီၤ. စီၤ​ပီလူး​မ့ၢ်​ပှၤ​ဃိာ်​ဖိ​သနာ်က့ ပှၤ​ဒုးအိၣ်​အီၤ​လၢ​ဟံၣ်​အဂၤ​တဖျၢၣ် ဒီး​ပှၤသုးဖိ​တဂၤ​ဘၣ်​အိၣ်ခိးကွၢ်​အီၤ​လီၤ. စီၤ​ပီလူး​အိၣ်​ဖဲ​န့ၣ် ယံာ်ဝဲ​ခံ​နံၣ်​လီၤ. ဖဲ​န့ၣ်​န့ၣ် ပှၤ​ဟဲ​ထံၣ်​လိာ်သး​ဒီး​စီၤ​ပီလူး ဒီး​အဝဲ​တဲဘၣ် ပှၤဂၤ​ဘၣ်ဃး​ဒီး​ယွၤ​အဘီ​အမုၢ် ဒီး​သိၣ်လိ​အဝဲသ့ၣ်​လၢ ယ့ၣ်ၡူး​အဂ့ၢ်​လီၤ. စီၤ​ပီလူး​ကွဲး​စ့ၢ်ကီး လံာ်ပရၢ​ဆူ တၢ်​အိၣ်ဖှိၣ်​တဖၣ်​အိၣ်​လၢ အ့ၡၢၣ်​ဒီး ယူဒၤ​အ​ပူၤ​လီၤ. ယဟိဝၤ​ယွၤ သူဝဲ​စီၤ​ပီလူး​လၢ က​စံၣ်တဲၤ​တဲလီၤ​ဝဲ ဘီမုၢ်​တၢ်သးခု​ကစီၣ်​လၢ ထံကီၢ်​အါဘ့ၣ်​အ​ပူၤ​လီၤ.