O nkangalu wantatu una Paulu kavanga wafokokela muna Yerusaleme. Ekolo kakala muna Yerusaleme, wakangwa yo siwa mu pelezo. Muna mona-meso kasongwa muna fuku, Yesu wamvovesa vo: ‘Kuna Roma okwenda yo sila ko umbangi.’ Paulu wakatulwa muna Yerusaleme yo filwa kuna Kaisaria, kuna kaviokesela mvu miole muna pelezo. Vava kafundiswanga kwa Feseto, Paulu wavova vo: ‘Nzolele fundiswa kwa Kaisa kuna Roma.’ Feseto wavova vo: “Wau vo Kaisa olombele; kwa Kaisa mpe okwenda.” Paulu wasiwa muna nzaza yayendanga kuna Roma. Mpangi zole z’Akristu, Luka ye Aresatako bayenda yandi entwadi.

Ekolo bakangalanga muna mbu, bawanana ye tembwa kiangolo kiazingila lumbu yayingi. Awonso babanza vo fwa befwa. Kansi, Paulu wavova vo: ‘Akundi, mbasi mosi umpovese muna fuku vo: “E Paulu kumoni wonga ko. Olwaka kuna Roma, awonso bena yaku muna nzaza vuluka bevuluka.” Nukala yo unkabu. Ke tufwa ko.’

E tembwa kiakwamanana mu lumbu 14. I bosi, bamona e sanga kia Melita. E nzaza yawandama vana ntoto yo vambana tini-tini. Kansi, awonso 276 bakala muna nzaza bavuluka. Akaka basiensia, akaka basimba muna tini ya nzaza yo lwaku kuna kumu. Esi Melita batoma kubalunga-lunga yo kwika e tiya kimana bayotela.

Vioka ngonde tatu, masoladi banata Paulu kuna Roma mu nzaza yankaka. Vava kalwaka, ampangi bayiza kunkingula. Vava kabamona, Paulu wavutula matondo kwa Yave yo vua unkabu. Kana una vo Paulu mu pelezo kakala, wayambulwa vo kazingila mu nzo ya mfutila yo yingilwa kwa soladi. Mvu miole kazingila mo. Wantu bayizanga kuntala, wabasamunwinanga e nsangu zambote za Kintinu kia Nzambi yo kubalonga mambu ma Yesu. Paulu watwika mpe nkanda muna nkutakani za Ásia Menor ye za Yuda. Yave wasadila kikilu Paulu mu sayanesa e nsangu zambote kwa esi zula.