Musipili wa Paulusi wabulaalu wa kukutaza neufelezi mwa Jerusalema. Hanaali mwa Jerusalema, naatamilwe ni kubeiwa mwa tolongo. Mwa pono ili ka nako ya busihu, Jesu naamubulelezi kuli: ‘Ukaya kwa Roma mi ukayo kutaza kwateñi.’ Paulusi naazusizwe mwa Jerusalema ni kuiswa kwa Sesarea, ili kwanaaizo ina lilimo zepeli mwa tolongo. Hanaazekiswa fapilaa Mubusisi Festusi, Paulusi ali: ‘Nikupa kuyo atulwa ki Sesare, mwa Roma.’ Festusi kihaa li: “Uipilelize ku Sesare; ukaya ku Sesare.” Paulusi naabeilwe mwa sisepe sene siya kwa Roma, mi naaile ni mizwale ba Sikreste bababeli ili Luka ni Aristarko.

Hane bali fa liwate, bakopana ni liñungwa leli maata ili lene litandile mazazi amañata. Bane bali mwa sisepe kaufela nebanahana kuli nebaka shwa. Kono Paulusi ali: ‘Baana, lingeloi linitaluselize mwa tolo kuli: “Usike wasaba, Paulusi. Ukaya kwa Roma, mi batu kaufela beuli ni bona mwa sisepe habana kushwa.” Mube ni bundume! Haluna kushwa.’

Liñungwa leo latanda mazazi a 14. Kwa mafelelezo, babona sioli. Neli sioli sa Melita. Sisepe sayo nata fa mushabati mi sapazuha kueza buemba-emba, kono batu kaufela ba 276 bane bali mwa sisepe bafita fa likamba kusina kozi. Babañwi batapa mi babañwi bona bakolatela kwa mabala a sisepe mi batapa kuya kwa likamba. Batu ba mwa sioli sa Melita babababalela ni kubatumbulela mulilo kuli bafutumalelwe.

Hasamulaho wa likweli zetaalu, masole baisa Paulusi kwa Roma ka sisepe sesiñwi. Hasaafitile kwa Roma, mizwale bataha kuto mubona. Hanaaboni mizwale bao, Paulusi aitumela ku Jehova mi aba ni bundume. Nihaike kuli Paulusi neli lipantiti, naalumelelizwe kuina mwa ndu ya kutelela inze akantelwa ki lisole. Naainzi mwa ndu yeo ka lilimo zepeli. Batu nebatahanga kuto mubona, mi naakutazanga ku bona ka za Mubuso wa Mulimu ni kubaluta ka za Jesu. Paulusi hape añolela mañolo liputeho za mwa Asia Minor ni Judea. Kaniti luli, Jehova naaitusisize Paulusi kushaela taba yende kwa batu babañata.