Pawulu wakuminini muYerusalema halwendu lwamuchisatu lwakushimwina. Dikwamukwatililiwu nakumusha mukaleya. Yesu wamulejeli muchimwenu nawufuku, nindi: ‘Wukuya kuRoma nakushimwina kwenoku.’ Pawulu amufumishili muYerusalema nakumutwala kuKesareya, kwashakaminiyi yaaka yiyedi mukaleya. Hamusompesheleñawu kudi Nguvulu Fesitusi, Pawulu wahosheli nindi: ‘Muloña wami awusompi kudi Kesari, muRoma.’ Fesitusi wahosheli nindi: “Chineli wunalombi neyi awutwali kudi Kesari; wunakuya kudi Kesari.” Pawulu amushili mumbopolu iku wakukasa hayileñawu kuRoma, nawa amanakwindi akaKristu ayedi, aLuka naArisitaka ayili hamu nindi.

Mpepela yeneni yayiwanini hakaluñalwiji, nawa yakunkili hadi mafuku amavulu. Wejima wawu atoñojokeleña nawu akufwa. Ilaña Pawulu wahosheli nindi: ‘Enu amayala, kañelu wanleja muchilota nindi: “Pawulu, bayi wutiya womaku. Wukushika kuRoma, nawa antu ejima iwudi nawu mumbopolu akupuluka.” Kolenu! Tukufwa wanyi.’

Iyi mpepela yeneni yatwalekelihu hadi mafuku 14. Nkumininaku, kumasaña kwamwekeni. Chadiña chituutu chaMelita. Mbopolu yanekamini nawa yabalokeli, ilaña antu ejima 276 adiña mumbopolu ashikili kumasaña chakadi kukala. Amu asalili nawa amakwawu endeleli hayibalu yambopolu nakushika kuchikumu. Antu akuMelita ayakameneni nawa ayibutwilili kesi kakwota.

Chimwahitili tukweji tusatu, amashidika amutwalili Pawulu kuRoma nambopolu yacheñi. Chashikiliyi, amanakwetu enjili nakumukinkilila. Pawulu chayimweniyi, wamusakilili Yehova nawa wakoleli. Hela chakwila Pawulu wadiña kayili, amwitejeli kushakama mwitala dakusonkela iku anakumuhemba kudi mushidika. Washakamini kuRoma hadi yaaka yiyedi. Antu enjileña nakumutala, nawa wayishimwinineña haWanta waNzambi nikuyidizisha hadi Yesu. Pawulu wasonekeli ninyikanda yatemesheleliyi yipompelu yamuAsia Minor  nimuYudeya. Yehova wamuzatishili chikupu Pawulu kulonda ataandishi nsañu yayiwahi kunyuza.