Aju toxin maj tqan Pablo tej t-xiʼ pakbʼal pon bʼaj toj Jerusalén. Atz tzalu tzyet tuʼn tokx qʼoʼn toj cárcel. Jun qonikʼan tej tokx toj cárcel, xi tqʼamaʼn Jesús jlu te toj jun witzikʼ: «Ma txiʼya Roma ex kpakbʼala toj tnam aju». Etztzun qʼiʼn Pablo toj tnam Jerusalén ex xi qʼiʼn toj Cesarea. Atz toj tnam lu, okx qʼoʼn kabʼe abʼqʼi toj cárcel. Jun qʼij, tej attoq Pablo twitz aj kawil Festo tuʼn tok toj xjel, xi tqʼamaʼn Pablo jlu te: «Wajbʼile tuʼn woke toj xjel tuʼn César toj Roma». Xi ttzaqʼweʼn Festo te: «Qa tajbʼila tuʼn toka toj xjel tuʼn César, ok kxel nsamaʼna jatumel taʼ César». Iktzun tten jax qʼoʼn Pablo toj jun bark aju xiʼ toj tnam Roma. I eʼx kabʼe erman tukʼil: a Lucas ex Aristarco.

Tej ateʼtoq toj bark tibʼaj mar, tzaj jun kyqʼiqʼ jbʼal kyibʼaj aju ten nim qʼij. Kykyaqil kubʼ kyximan qa che kyimel. Pero xi tqʼamaʼn Pablo kye: «Aqeye xjal, ma tzaj tqʼamaʼn jun anjel jlu weye toj jun witzikʼ: ‹Miʼn tzaj xobʼa. Ok kpola toj tnam Roma, ex kykyaqil qeju ateʼ tukʼila toj bark che kletel›. Tuʼntzunju ¡miʼn che xobʼe! Mlay qo kyim».

Ikʼx nim nya bʼaʼn kyuʼn tuʼn kyqʼiqʼ jbʼal toj 14 qʼij. Yajxitl, e kanin jatumel at txʼotxʼ. Otoq che pon toj piẍ txʼotxʼ Malta tbʼi. Kyaj qʼeʼt bark ex kubʼ xitj, pero mintiʼ e kyim qeju 276 xjal ateʼkxtoq toj bark ex e kanin ttzi mar. At junjun e nadarin tuʼn kypon, atzun junjuntl e pon tibʼaj junjun piẍ bark. E ok xqʼuqin kyuʼn xjal te Malta ex kubʼ kyqʼoʼn qʼaqʼ kywitz tuʼn kymeqʼt.

Tej tikʼ oxe xjaw, e ul soldad qʼilte Pablo toj juntl bark tuʼn t-xiʼ Roma. E kanin erman kʼamolte tej tpon. Tej tok tqʼoʼn Pablo twitz tiʼj jlu, xi tqʼoʼn chjonte te Dios ex o tzalaj. Maske presintoq taʼ Pablo, xi qʼoʼn ambʼil te tuʼn tanqʼin toj jun ja majentoq ex xqʼuqintoq tuʼn jun soldad. Kabʼe abʼqʼi ten atztzun. E kanin xjal visitaril te, ex ok ten Pablo pakbʼal tbʼanel tqanil tiʼj Tkawbʼil Dios kye ex xi tqʼoʼn xnaqʼtzbʼil kye tiʼj Jesús. Ax ikx xi ttzʼibʼin Pablo qe tal uʼj kye junjun kʼloj okslal te Asia Menor ex toj Judea. Qʼanchaʼlxix qa ajbʼen Pablo tuʼn Jehová tuʼn t-xi tiʼn tbʼanel tqanil tiʼj Dios kye txqantl tnam.