Paulo wamaliliile ulwendo lwakwe citatu umu Yelusalemu. Kuuku akuno yamulemiile nu kumwika umu cifungo. Usiku, Yesu wamunenyile umu cilolwa ati: ‘Ulaya umu kusimikila uku Loma.’ Paulo yamufumizye uku Yelusalemu iyamutwala uku Kesaliya, kuno waile amala imyaka iili mu cifungo. Lino Fesitasi Kateeka wamupeelanga imilandu, Paulo watiile: ‘Lekini ntwale umulandu kuli Kaisale uku Loma pakuti aliwe akampingule. Fesitasi walanzile ati: “Watulenga kuti utwale umulandu kuli Kaisale, fwandi kuli Kaisale kwene akuno ulaya.” Paulo yamukwezizye umu wato uwayanga uku Loma, nupya Aina Klistu yaili, Luka na Alisitaka yapisile nawe.

Lino yali pa lwendo, kwakatwike icimuza icipisye nupya camazile manda aingi. Yonsi yelenganyanga ukuti yamafwa. Nomba Paulo wayanenyile ati: ‘Mwe yantu, malaika wali wanena umu ciloto ukuti: “Paulo, utatiina. Umafika uku Loma nupya yonsi yano uli nayo umu wato yamapusuka.” Fwandi sipini! Tusikufwa.’

Icimuza camazile manda 14. Nu mukusyalikizya, icituntu catandike ukuloleka. Cali icilila ca Melita. Uwato wakumizye apansi nu kutika nupya watandike ukulepoka, lelo antu yonsi 276 yapuswike. Yamwi yatandike ukowa, yauze nayo yalemile uku tupimfya twa wato iyatandika ukwelela pa manzi mpaka iyafika uku cituntu. Antu aa mu Melita yayasakamile nupya yapemvile umoto pakuti yayo apuswike yoote.

Pa cisila ica myezi itatu, asilika yakwezizye Paulo umu wato uze nu kumutwala uku Loma. Lino yafisile kuuku, aina yaile umu kumukomenkanya. Nupya lino Paulo waweni aina, wataizye Yeova nupya wasifile. Nanti cakuti Paulo wali u mufungwa, yamuzumilizye ukwikala umu ng’anda iya kusonkela ala nu musilika akumulinda. Nupya wikazile kuuku pa myaka iili. Antu yayanga umu kumulola, nupya wayasimikilanga pa Wene Wakwe Leza nu kuyasambilizya pali Yesu. Paulo walembanga makalata uku vilongano vya mu Asia Minor ni vya mu Yudeya. Umu cumi Yeova waomvizye Paulo ukusalanganya ilyasi lisuma umu mpanga izingi.