A Poll sẽn gilg naoor a tãab-n-soab n moon koɛɛgã, a lebg n waa Zerizalɛm, tɩ b yõk-a n kẽes bãens-roogo. Ne yʋngã, a Zeezi vẽneg-a lame n yeel-a yaa: ‘Fo na n kẽnga Rom n tɩ moon koɛɛgã.’ B talla a Poll n yi Zerizalɛm n kẽng Sezaare. Be, a maana yʋʋm a yiib bãensã roogẽ. B wa n tall-a lame n kẽng guvɛrneer a Fɛstus taoore, t’a yeel yaa: ‘M datame t’a Sezaar kao mam bʋʋd Rom.’ A Fɛstus leokame: “Fo sẽn dat rĩm a Sezaar nengẽ wã, f na n kẽnga rĩm a Sezaar nengẽ.” B kẽesa a Poll batayo t’a na n loog Rom, la saam-biis a yiib n tũ-a. Yaa a Luk ne a Aristark.

B sẽn wa n be koomã sʋk ne batayo wã, sob-kẽeng n yiki, n kaoos rasem wʋsgo. Nebã fãa ra tẽedame tɩ b na n kiime. La a Poll wa n yeelame: ‘Kelg-y-yã. Malɛk n yeel maam zãmsd pʋgẽ yaa: “Polle, ra zoe rabeem ye, yaa tɩlɛ tɩ fo ta rĩm a Sezaar taoore.” Dẽ wã yĩnga, ra yɛɛs-y ye. Ned baa a ye pa na n ki ye.’

Sobgã kaoosa rasem 14. B wa n tool n nee tẽnga. Yaa Malt tẽngã. Batayo wã yẽ ra fãoo bũmb n wã zãnga, la neb 276 baa a ye pa ki ye. Kẽer rugame, tɩ sãnda gãd batayo wã raadã, n dug n tãag koomã noore. Malt nebã gesa b yell sõma, n widg bugum n kõ-b tɩ b woode.

Kiis a tãab poore, sodaasã talla a Poll n kẽ batayo a to n loog Rom. B sẽn ta wã, saam-biisã wa n seg-a lame. A Poll sẽn yã-bã, a paama raoodo, n pʋʋs a Zeova barka. Baa b sẽn da yõk a Pollã, b basame t’a bao roog n be be, n yaooda, la b kɩt tɩ sodaag gũud-a. A zĩnda be yʋʋm a yiibu, tɩ nebã wat n get-a, t’a moond-b Wẽnnaam Rĩungã koɛɛga, la a zãmsd-b bũmb wʋsg a Zeezi zugu. A Poll gʋlsa lɛta wʋsg me n tool tigimsã sẽn be Aazimineer la Zide wã. A Zeova sɩd kɩtame t’a Poll moon koe-noogã tẽns wʋsgo.