Keman Pablo ika expa tanojnotstinemik, matamik ompa Jerusalén. Ompa kikitskijkej. Se youak, keman tsaktoya, Jesús kiitaltij se taman uan kiluij: “Tiyati Roma uan ompa titanojnotsas”. Satepan Pablo kiuikakej hasta Cesarea, kampa tsaktoya ome xiuit. Se tonal, keman moajsia iixpan tekiuaj Festo, Pablo kiluij: “Nikneki maj César nechmelaua ompa Roma”. Festo kinankilij: “Komo tikneki maj César mitsmelaua, nimitstitaniti iuan César”. Yejua ika kiuikakej Pablo itech se barco tein yaya Roma. Iuan yajkej ome tokniuan: Lucas uan Aristarco.

Keman yajtoyaj itech ueyiat, peuak chikauak kiouaejeka uan uejkauak miak tonalmej. Nochin kinemilijkej ke mikiskiaj. Sayoj ke Pablo kiniluij: “Takamej, se ángel nechiluij itech se takochitalis: ‘Amo ximoui. Tiajsis Roma, uan nochin akin moajsij itech barco makisaskej’. Yejua ika, ¡ximoyolchikauakan! Amo timikiskej”.

Satepan ke 14 tonalmej mochikaujtoyaj kinejnemiltiskej barco itech nejon ueyi kiouaejekat, kiitakej ke ajsitiyayaj atenoj. Ajsikej kampa motatokaytia Malta. Barco motsikoj uan kojkopinik, sayoj ke nochin 276 taltikpakneminij uelik ajsikej atenoj. Sekin moatamotkej uan oksekin mokitskijtiyajkej itech tein kojkopinka itech barco. Akin nemiaj Malta kinyekpiakej uan taxotaltijkej kampa mokauantiskiaj.

Eyi metsti satepan, tateuianij kiuikakej Pablo itech okse barco hasta Roma. Tokniuan kinamikitoj keman ajsik. Keman kinitak, Pablo kitasojkamatilij Dios uan moyolchikauak. Maski kiixtalijkaj maj tsakto, kikaujkej maj nemi itech se kali tein taneujkej uan maj se tateuijkej ompa tajpixtoni. Ompa tsaktoya ome xiuit. Taltikpakneminij kikalpanouayaj, uan yejua kinixmatiltiaya tein kichiuas iTekiuajyo Dios uan kinmachtiaya tein Jesús tanauatijka. Pablo no kijkuiloj amamej tein kintitanik itech nechikolmej tein moajsiaj Asia Menor uan Judea. Senkis moita ke Jiova kichiuak maj Pablo kiteixmatiltiani itech miak altepemej tein kuali tein kichiuas Dios.