Hwendo o citatu wo kucumaera wa Pauro, wakagumisira ku Jerusarema. Asi painga ari kondhoyo wakabatwa zve wodihwa mukadheya. Paainga ecivata pakati po usiku, wakava no civoniso ca Jesu ecimubvunja kuti : ‘Unozoenda ku Roma zve unozodiitira ufakazi.’ Pauro wakabviswa ku Jerusarema woendeswa ku Sezareya, paakapeja makore maviri mukadhea. Paainga ecitongwa ndi guverinadhori Festo, Pauro wakati: ‘Ndinoda kutongwa ndi Sezare, ku Roma.’ Festo wakapingura kuti: ‘Wapota kuenda kuna Sezare, unozoenda ka Sezare.’ Pauro wakakhwijwa mu piketi yoenda ku Roma zve wakaenda no hama mbhiri jo ciKristu, Ruka pomwe na Aristarko.

Pavainga vari mu jombe, kwakaitika dutu rakavanga maningi, rakapeja mazuva akawanda. Vese vairangarira kuti vaida kufa. Asi Pauro wakati: ‘Vanarume, ndarota ngirozi yecidibvunja kuti: “Ucathya, Pauro. Unodika kuguma kuna Sezare. Ndibzo, Mwari anokupa uhomi hwo vese vana iwewe mu piketi.” Cunganyi! Itusu atizofi.’

Dutu riya rakabvuta ku mazuva anokwana kuita 14. Pakupejisira vakavona mutundhu. Kwainga cirundu co kuMarita. Piketi yakaphwanyika-phwanyika, asi vese vaikwana kuita 276 vakakwanisa kuguma kumutundhu. Vamweni vakaita zvo kusambira, vamweni vakapakira pa zvibhwendu zvo piketi. Vandhu vaigara kuMarita vakavabhwakijira muriro kuti vajiihwe.

No papera mweji mutatu, masoca akatora Pauro kuenda naye ku Roma. Paakaguma, hama jakaenda kosongana na iyena. Pakajivona, Pauro wakabonga Jehovha zve wakavangiswa maningi. Pikija kuti Pauro wainga musungwi, iyena wakatendehwa kugara pa nyumba iri yese yo kurugahwi asi ecingwaririhwa ngo masoca. Wakagara makore maviri naari pa nyumbepo. Vandhu vaiviya komuvona zve iyena waivacumaera ngo pamusoro po Umambo hwa Mwari no pamusoro pa Jesu. Pauro wakatarazve tsamba ku ungano jo ku Asia Menor no kuJudha. Jehovha wakashandisa Pauro kuti acumaere masoko akanaka ku vandhu vo majinja.