Ekwaha yaneeraru ya Paulo yaakotenle o Yerusalemu. Aaphiyaleiye weiwo owo aamaniwa ni owaleliwa mukalaposo. Yesu aamuleela mu yawoona emoha ohiyu ariki: ‘Onaphwanela tho oya o Roma wakerele onamoona.’ Paulo aakuxiwa o Yerusalemu akerihiwa o Kaisareya weiwo aamalinheiye iyaakha piili ari mukalaposo. Arikimuthorihiwa variyari va Musatoro Festu, Paulo aahi: ‘Kiye wa Sesar o Roma.’ Festu aamwaakhula: ‘Woomuromola Sesar, onamuyawo.’ Paulo aanwela pophoro ayaaka o Roma nave Luka ni Aristarku yaachaanana ni yoowo.

Eri mu pophoro, yaakhumelela echeku etokweene yeeyo yaamalinhe mahiku mancipale. Achu oothene yuupuwela wi yaahaala okhwa. Nto Paulo aahi: ‘Alopwana, ohooneya Munkeelo wa miyo aakileela ariki: Paulo ohoove echu. Ntakhara weyaano onaphwanela oya o Roma wa nthowa na Muluku onamwepesaawe. Weyaano onamvuluwa ni alopwana oryaaweno mpophoroni. Mwa yeeyo mulipe murima.’

Echeku eyo yaamaliha mahiku 14. Voocharela yaapacerya wooneya evilivili ya Malta. Pophoro aakhumula echaya nave aatapaseya, nyenya achu oothene awaakhwana 276 yaawerya olapuwela echaya yawuuma. Akina yaarimweekha nave akina yaaphanre itapatha sa pophoro wi ephiye okhopela. Achu a evilivili ya Malta yaawaakhela phaama nave yaahiiseela mooro wi yoore.

Ivinrevo miyeeri miraru, anakhoco yaamukuxa Paulo enweliha pophoro mukina wi eye o Roma. Vaavaa Paulo aaphiyaleiye, anna yaarwa omoona. Paulo aamuthamalela Yehova ni akhala oolipa murima nthowa na owoona anna. Paulo aaneemereryiwa okhalaka empa vyakala awehereryiwaka ni nakhoco. Owo aakhala o Roma iyaakha piili. Achu yaanarwa wi emuxekurye nave owo aanaahusiha vooloca sa Omwene wa Muluku ni Yesu. Paulo aarepa ikaarata wa miloko sa Asiya Mukhaani ni Yuteya. Chiryene Yehova aampharihela Paulo wi alaleerye michaka yaphaama wa maloko mancipale.