Ba Yeruzalema gafuriata wofanö Waulo si medölu kali. Ba daʼö laraʼu ba labeʼe ia ba gurunga. Samuza inötö me bongi, imane khönia Yesu ba gangilata, ’Aeʼe ba Roma ba turiaigö duria somuso dödö ba daʼö.’ Laʼohe Waulo moroi ba Yeruzalema numalö ba Kaisarea ba dua fakhe labeʼe ia ba gurunga. Me ihuku ia Gubernur Feso, imane Faulo, ’Omasido na Kaisaro zanguhuku yaʼo ba Roma.’ Imane Feso, ”Börö me öʼandrö wolohe daʼa föna Kaisaro, ba hasambalö möi ndraʼugö khö Kaisaro.” Börö daʼö, laʼohe Waulo ba Roma latörö göfa nasi fao darua niha Keriso tanö böʼö yaʼia daʼö Luka ba Arisaro.

Ba wofanöra alua mbade sebua ba lö tebato mato hauga hari. Fefu niha si so yawa ba göfa lawalinga mate ira saʼae. Hizaʼi imane khöra Faulo, ’No iwaʼö khögu malaʼika ba wangifi: ”Böi ataʼufi Faulo, hasambalö ofeta ndraʼugö ba Roma ba teʼorifi fefu niha ba göfa daʼa.” Börö daʼö böi miʼataʼufi! Lö mate ita.’

Alua mbade sabölö-bölö andrö 14 hari waʼara. Ba gafuriata, laʼila dete danö. Daʼö hulo Malata. Ba daʼö tosake göfa andrö ba adudu, hizaʼi teʼorifi zi 276 niha ba göfa daʼö. So zolangi ba so göi zololohe balö-balö wafa adudula göfa ofeta ba ngöfi. Latolo ira niha Malata ba lafewuaʼö galitö ba woleu yaʼira.

Tölu waŵa aefa daʼö, laʼohe Waulo ba Roma ira saradadu faoma köfa tanö böʼö. Me ofeta Waulo, lafalukhaisi ia ira niha Keriso ba daʼö. Me iʼila ira, mangandrö saohagölö Waulo khö Yehowa ba tefarou dödönia. Hewaʼae tobali niha gurunga Waulo, hizaʼi tola toröi ia ba nomo niʼokosi. Samösa zaradadu sozago yaʼia. Dua fakhe toröi ia ba nomo daʼö. Ato niha zamalukhaisi yaʼia, ifatunö khöra Wamatörö Lowalangi ba ifahaʼö ira sanandrösa khö Yesu. Ifaʼoheʼö zura göi ba mbanua niha Keriso ba Asia Kecil hegöi ba Yudea. Sindruhu wa iʼogunaʼö ia Yehowa ba wanuriaigö turia somuso dödö misa ba ngawalö soi.