Paul nahojilneʼgo tágídi tázhdííyáhígíí Jerúsalemgi bee nihoolzhiizh. Ákwii hoʼdiiltsood áádóó awáalya ahoʼdooltʼeʼ. Tłʼéeʼgo hoł áhoodzaago Jesus áháłní: ‘Romegóó díínááł, áadi nahólneʼ doo.’ Jerúsalemdóó Sesaríyajįʼ hoʼdeedlóóz, áadi éí awáalya jizdáago naaki nááhai. Naatʼáanii Féstas bidáahgi haa hwiinítʼı̨́įgo Paul ájíní: ‘Romedi Síízar bidáahgi shaa náhódóotʼįįł.’ Féstas áháłní: ‘Síízar yííníkeed, áko ákǫ́ǫ́ bichʼįʼ díínááł.’ Paul éí Luke dóó Aristárkas, Oodlání nidiltʼéego, Romegóó tsinaaʼeeł deezʼéél léiʼ biih jííjééʼ.

Hoł ooʼołgo yéigo deeyol, áko tónteel tʼóó bááhóódzííd. Tʼáá ákótʼéego ląʼí yiską́. Tʼáá ájíłtso dadíníiʼnééł dazhnízin. Ákondi Paul áháłní: ‘Hastóí danohłíinii, neiséyeelgo diyingo naalʼaʼí áshíłní: “Paul, tʼáadoo nił yéʼí. Romedi díínáałgo átʼé. Bił yikahígíí tʼáá ałtso yisdázhdookah.” Hadaʼíínółní! Doo díníiʼnéeł da.ʼ’

Yéigo níyolgo 14 yiską́. Áadi índa kéyah dadziiłtsą́, éí Málta kéyah siʼánígíí átʼé. Tsinaaʼeeł yę́ę séí biih yiltsʼid áádóó diitaaʼ, ákondi 276 jiltʼéhígíí yisdájookai. Łaʼ daʼíłkǫ́ǫ́, łaʼ éí tsinaaʼeeł diitaaʼ yę́ę dajótąʼgo hóółtseijįʼ yisdájiiskai. Máltagi diné kǫʼ ádayiilaago ńdaʼjiidziil áádóó háká ííjééʼ.

Tááʼ nídeezidgo, siláo éí tsinaaʼeeł náánáłaʼ bee Romegóó Paul bił dah náázhdiikai. Romedi hoʼdeedlóozgo brothers hadááh daaskai. Paul éí habrothers jiiłtsą́ągo Jiihóvah bichʼįʼ ahééh jiniizı̨́ı̨́ʼ áádóó chánah áhoolaa. Azhą́ awáalyahí jílı̨́į ndi, hooghan łaʼ haʼdeetʼą́ągo ákwii siláo dahótąʼ. Kótʼéego hoł hazʼą́ągo naaki nááhai. Diné haa nídaakahgo Diyin biNahatʼaʼ bił hazʼáanii índa Jesus baa haneʼii bee nazhnitin. Asia Minor dóó Judíyadi congregations bichʼįʼ naaltsoos ádajileʼ. Jiihóvah éí Paul nizhónígo choyoosʼįįdgo ląʼígóó haneʼ yáʼátʼéehii yaa nahasneʼ.