Oungendi wa tatu wokuivisa wa Paulu wamanuhukila mo Jelusalei. Akuatwa apakwa mokaleya. Jesus wemumonekela memonekelo kounthiki emupopila okuti: ‘Ove muende ko Roma iya ngako ukaivisa.’ Avapolo Paulu ko Jelusalei avemutuala ko Sesarea, ngako akala omanima evali mokaleya. Mokonda ankho vemumonesa ononkhumbi Paulu apopila omutumini Festu okuti: ‘Nthualei ndyikakoyeswe na Sesale ko Roma.’ Festu ati: “Mokonda uhanda okuenda ku Sesale oko muende.” Avakutu Paulu avemupake mo mbapolo opo vemutuale ko Roma iya ovakuatate vevali, Luka na Aristarcu avaende nae.

Etyi vati melunga, akumoneka epuku-puku enene, liakala ononthiki ononyingi. Aveho avasoko okuti mavankhi. Mahi Paulu ati: ‘Oandyu imwe yamphopila mondyoi okuti: “Uhatile owoma Paulu. Amuho mamuhiki ko Roma iya ombapolo aihanyauka aikala ovinthimbu.” Kalei tyapama! Onthue kamatunkhi.’

Epuku-puku olio alikala ononthiki 14. Konyima eheke alihimbika okumoneka. Ankho okalongo kekahi pokati komeva katiwa Malta. Owato ankho ulituala-tuala iya auteka-teka ovinthimbu, mahi ovanthu 276 ankho veli mowato avahupu. Tyati vamwe ankho vayoa vala ngotyo iya ovakuavo wakuata ovinthimbu vio viowato. Ovanthu vo ko Malta avevetambula nawa, avanthiakana otupia opo vaandulukwe.

Konyima yonohanyi ononthatu, omafualali atuala Paulu ko Roma no mbapolo onkhuavo. Etyi vehika, ovakuatate aveya okulimona-po nae. Etyi Paulu evemona, apandula Jeova iya akala tyapama. Namphila Paulu ankho akuatwa, mahi ankho uli mondyuo yae muene otyo ayungwa. Akala-mo omanima evali. Putyina ovanthu vekemutala, ankho uvelongesa konthele youhamba wa Huku iya no konthele ya Jesus. Tupu Paulu ankho uhonekela omikanda omawaneno o Asia Menor no Judeia. Tyotyili Jeova waundapesa Paulu opo ayandyanese onondaka onongwa komalongo aeho.