Paulus siene dredde Prädichtreis wia en Jerusalem to Enj. Doa wort dee faustjenomen un enjestopt. Eene Nacht säd Jesus en eene Vision to Paulus: “Du woascht no Room komen un doa prädjen.” Paulus wort von Jerusalem no Cäsarea jebrocht un wia doa twee Joa em Jefenkjnis. Aus Paulus bie dän Harscha Festus verem Jerecht wia, säd hee: “Lot mie von dän Kjeisa en Room jerecht woaren.” Festus säd: “Du wust vom Kjeisa jerecht woaren. Nu woascht du verem Kjeisa komen.” Paulus wort opp een Schepp noppjebrocht, waut no Room fua, un twee Gloowesbreeda, Lukas un Aristarch, reisden met.

Aus see oppem Mäa wieren, kjeem een groota Storm opp, un dee hilt doagenlank aun. Aule dochten, see wudden stoawen. Oba Paulus säd: “Mana, fot Moot! Wie woaren nich stoawen. Een Enjel säd en eenen Droom to mie: ‘Hab nich Angst, Paulus. Du woascht bat Room komen, un aule oppem Schepp woaren läwen bliewen.’”

Doa wia aul 14 Doag Storm jewast. Entlich kunnen see Launt seenen. Daut wia de Insel Malta. Met eenst schlapt daut Schepp opp un bruak doa to Bieta. Oba aule 276 Menschen kjeemen jlekjlich bat de Kaunt. Eenje schwommen un aundre hilden sikj aun Bieta von daut Schepp un kjeemen soo no de Kaunt. De Menschen von Malta kjemmaden sikj om dee un muaken een Fia, daut dee sikj woamen kunnen.

Dree Moonat lota brochten de Soldoten Paulus met een aundret Schepp no Room. Aus hee bat doa wia, kjeemen de Breeda dän entjäajen. Aus Paulus dee sach, dankt hee Jehova un wia wada mootich. Wan Paulus uk faustjenomen wia, kunn hee en een jepachtet Hus wonen, un een Soldot woakt äwa dän. Doa bleef hee twee Joa. De Menschen, waut no am kjeemen, prädijd hee von Gott sien Kjennichrikj un lieed dee von Jesus. Paulus schreef uk Breew no de Vesaumlungen en Kjlien-Asien un no dee en Judäa. Daut es werkjlich to seenen, daut Jehova Paulus brukt toom de Velkja de goode Norecht brinjen.