Pabloqa predicashaspa kinsa kaj viajenta Jerusalenpi tukucharqa. Chaypitaj carcelman wisqʼaykorqanku. Uj chʼisitaj payman Jesús mosqoypi jina nerqa: “Romaman rinki, chaypitaj predicanki”, nispa. Chantá Pablota Jerusalenmanta Cesareaman aparqanku. Chaypitaj iskay watata carcelpi karqa. Uj día, Festoj juzgadonpi kashaspa nerqa: “César juzganawanta munani, payman pusawaychej”, nispa. Festotaj nerqa: “César juzgasunanta munanki chayqa, Cesarman rinki”, nispa. Chantá payta Romaman rej barcopi aparqanku. Paywantaj Lucaswan Aristarcowan rerqanku.

Jatun qochapitaj ashkha diasta sinchʼi wayrapi karqanku. Tukuytaj wañunankuta yuyarqanku. Pablotaj nerqa: “Wiraqochis, uj ángel mosqoypi niwarqa: ‘Ama manchikuychu. Romaman chayankipuni, barcopi qanwan rejkunapis mana wañonqankuchu’, nispa. Chayrayku, ¡ama manchikuychejchu! Mana wañusunchu”, nispa.

14 diastaña sichʼi wayrapi kaspataj, jallpʼata rikorqanku. Chaytaj Malta churu karqa. Barcoqa yaku ukhupi tʼiyuman satʼiykukuspa, phirikorqa. Jinapis 276 runasqa qocha kantuman chayarqanku, wakenqa nadaspa, wakintaj barcoj ima pʼakisqallamantapis japʼikuspa. Maltamanta runasqa, paykunata mayta yanaparqanku, qʼoñikunankupajtaj ninata japʼicherqanku.

Kinsa killanmantaj soldadosqa Pablota waj barcopiñataj Romaman aparqanku, hermanostaj payta suyaj rerqanku. Pablotaj paykunata rikuspa Diosman agradecekorqa, kallpachakorqataj. Presochasqa kajtinpis alquilakusqan wasipi tiyakojta saqerqanku, chay wasitataj uj soldado qhawasharqa. Chaypitaj Pabloqa iskay watata karqa, waturikoj rejkunamantaj Diospa Gobiernonmanta predicaj, Jesusmantapis yachachej. Chantapis payqa Asia Menorpi, Judeapi kaj congregacionesman cartasta qhelqarqa. Chaytaj rikucherqa, Jehová Diosqa Pablowan sumaj willaykunata tukuy nacionesman willachishasqanta.