Kima kaq viäjinchöqa, Jerusalenyaqmi Pabluqa yachatsikur charqan. Y tsëchömi prësu tsariyarqan. Juk paqasmi carcelchö këkaptin, “Römatam ëwanki, y tsë markachömi yachatsikunki” nirqan Jesus. Tsëpitaqa Cesarëa markamanmi Pabluta apayarqan. Y tsëchömi ishkë wata carcelarätsiyarqan. Juk kutim, juezkunapa puntankunachö gobernador Festuta kënö nirqan: “Römata gobernaq Römachö juzgamänantam munä” nishpa. Tsënam Festuqa, “Römata gobernaq juzgashunëkita munaptikiqa, Römata gobernaqmanmi pasatsishqëki” nirqan. Tsëmi juk barcuman lloqarkatsir Römaman apayarqan. Y creikoq mayinkuna Lücaswan Aristarcum yanaqäyarqan.

Lamarpa viajëkäyaptinmi feyupa vientur y tamyar qallëkurqan, y atska junaqkunam tsënö karqan. Tsëmi llapankuna ushakäriyänampaq kaqta pensayarqan. Peru Pabluqa kënömi nirqan: “Wiyarayämë, suëñïnïchömi juk angel, ‘ama mantsakëtsu. Chankim Römaman. Qamwan barcuchö llapan këkaqkunam salvakuyanki’ nimashqa. ¡Valorta tsariyë! Manam ushakäshuntsu”.

Y feyupa vientur sïguiptinmi 14 junaq imëkapa pasayarqan. Peru illaqpitam patsata rikäriyarqan. Malta nishqan islam kanaq. Tsëman chëkäyaptinmi barcunkuna pakir ushakärirqan, peru 276 viajërukunaqa imëkanöpam lamar kuchunman chäyarqan. Wakinmi nadëpa, y wakinnam barcupa pakipinkunawan. Maltachö täraq nunakunaqa shumaqmi chaskiyarqan y qoñükuyänampaqmi ninata tsaritsiyarqan.

Tsëpita kima killa pasariptinmi soldädukunaqa juk barcuwanna Pabluta Römaman apayarqan. Y creikoq mayinkunam chaskeq ëwayarqan. Pëkunata rikëkurmi Pabluqa Diosta alläpa agradecikurqan y valorta tsarirqan. Pablutaqa alquilashqa wayichömi prësu katsiyarqan, y juk soldädum cuidarqan. Tsënömi ishkë wata karqan. Tsëman watukaqnin chaq nunakunatam Diospa Gobiernumpita y Jesuspita yachatseq. Jina tsëpita patsëmi Pabluqa Asia Menorchö y Judëachö congregacionkunaman cartakurqan. Rikanqantsiknöpis, Pabluqa Jehoväpa munëninta rurarmi mëtsika nacionkunachö alli willakïkunata willakurqan.