Pabloca paipaj quimsa viajepica Jerusalencamami rirca. Chaipi huillashpami paipaj viajetaca tucuchirca. Chai llajtapimi paitaca carcelpi churarcacuna. Shuj tutaca Jesusca muscuipi laya ricurishpami, ‘Roma llajtaman rishpa, chaipi huillagri’ nirca. Qꞌuipaca Jerusalenmanta Cesareaman apajpimi Pabloca ishqui huatacunata carcelpi carca. Shuj punllaca Pabloca mandaj Festopaj ñaupajpimi, ‘ñucataca Cesartaj juzgachunmi nini’ nirca. Chaimi Festoca, ‘Cesarllataj juzgachun nishcamantaca paipajmanmi cachasha’ nirca. Qꞌuipataca Roma llajtaman richunmi shuj barcopi cacharca. Paihuanca Lucaspish Aristarcopishmi rirca.

Barcopi ricujpica shuj jatun huaira, tamyami achca punllacunata jatarirca. Chaimantami maiman mana ri pudircacuna. Tucuicunami, ‘¡cunantajca huañushunmi!’ nircacuna. Shinapish Pabloca, ‘shuj angelmi muscuipi cashna nirca, “ama manchaichijchu, shujllapish mana huañunguichijchu. Roma llajtamanca chayanguichijmi”’ nircami.

Huaira, tamya jarcacujpipish 14 punllacunata barcota purichishpa caticujpimi ñapish shuj islata ricurcacuna. Chai islaca Malta shutimi carca. Chaiman chayacujpica barcoca allpapi canirishpami saquirirca. Chaipimi tucui barco pꞌaquirirca. 276 gentecunamantaca partecunaca nadashpa, shujtajcunaca barco pꞌaquirishcacunapi japirishpami islaman chayarcacuna. Chai islapi causajcunaca paicuna cunuchunmi ninata japichircacuna.

Quimsa quillacuna qꞌuipaca soldadocunami Pablotaca Roma llajtaman shujtaj barcopi pusharcacuna. Ña chayajpica huauqui panicunaca ricunamanmi rircacuna. Paicunata ricushpami Pabloca cushilla sintirishpa Diosta pagui nirca. Pabloca ishqui huatacunatami shuj alquilashca huasipi prezu saquirirca. Shuj soldadomi paita cuidarca. Paita visitanaman rijpica Dios churashca Mandanamanta, Jesusmantapishmi yachachirca. Shinallataj Asia Menorpi tiyaj congregacioncunaman, Judeapi tiyaj congregacioncunamanpishmi cartacunata quillcarca. Jehovami achca llajtacunapi alli huillaicunata huillachun Pablotaca cachashca carca.