Pabloqa kinsa kaq viaje ruwasqantaqa Jerusalenpin tukuran. Chaypi kashaqtinmi presota jap’iranku. Juj tutan carcelpi kashaqtin rijuriypi Jesús niran: “Roma llaqtamanmi rinki, chaypitaq predicanki”, nispa. Jinan Pablota Jerusalenmanta Cesarea llaqtaman aparanku. Chaypiqa iskay watan carcelpi karan. Juj p’unchaymi Festo kamachikuq juzgashaqtin Pabloqa niran: “Romapi Cesarpa juzgawanantan munani”, nispa. Festotaq niran: “Paypa juzgasqan kaytataq munanki chayqa Cesarman apachisayki”, nispa. Jinan Pablota Roma llaqtaman riq barcoman wichachiranku, Lucaswan Aristarcowantaq acompañaranku.

Viajashaqtinku askha p’unchaykuna sinchita wayramuran paramuran ima, jinan mana maymanpas riyta atirankuchu. Llapankun wañunankupaq piensaranku, Pablon ichaqa niran: “Wiraqochakuna ama manchakuychischu, juj angelmi mosqoyniypi niwaran: ‘Ama manchakuychu, chayankin Roma llaqtaman, barcopi kaqkunapas salvakunqakun’”, nispa.

Barcopi kaqkunaqa 14 p’unchaymi barcota ñak’ayta purichiranku, jinan rikuranku Malta sutiyoq islata. Manaraq chayashaqtinkun barcoqa plantakuspa p’akikapuran, 276 viajaqkunataq nadaspa barcoq k’aspinkunamanta jap’ipakuspa ima islaman chayaranku. Chay islamanta runakunaqa sumaqta chaskispan q’oñikunankupaq ninata raurachiranku.

Kinsa killa qhepamanmi Pablota juj barcopi Roma llaqtaman aparanku. Chayamusqanta yachaspan hermanokunaqa chaskiq jamuranku. Paykunata rikuspan Pabloqa Diosta agradecekuran, kallpachasqataq sientekuran. Presoña karan chaypas, wasita alquilakuspan soldadoq qhawasqan tiyaran. Chaypin iskay wata karan, runakunaqa visitaqkun, paytaq Diospa gobiernonmanta predicaq Jesusmantapas yachachiq. Cartakunatapas qelqaranmi Asia Menor ladopi, Judea llaqtapi tarikuq iñiq t’aqakunaman. Arí, Diosmi Pablota utilizaran askha nacionkunapi predicananpaq.