Apóstol Pablo quimsa viajeta shuj llactacunaman villachingapaj rishpaca Jerusalén llactapimi tucuchirca. Chaipimi prezo japirca. Shuj tuta carcelpi cajpimi Jesusca shuj muscuipi shina Pabloman cashna nirca: ‘Roma llactapipash villagrinapachami cangui’ nishpa. Chai jipaca Pablotaca Jerusalenmanda, Cesarea llactamanmi aparca. Chaipimi ishcai huatacunata prezo carca. Shuj punllaca tribunal ucupi llactata mandaj Festo shuti runapa ñaupajpi cashpami apóstol Pabloca cashna nirca: Roma llactamanda ‘César tapuchihuachunmi’ munani nishpa. Chaimi Festo runaca nirca: “César ñucata tapuchihuachun ninguimi. Cunanga, Cesarpajmanmi rina cangui” nishpa. Shinami apóstol Pablotaca shuj barcopi Roma llactaman aparca. Pablotaca Lucaspash, Aristarcopashmi cumbashpa rirca. Paicunaca Jesusta catijcunami carca.

Ña marpi cajpimi tauca punllacunata ninan huaira jatarishpa yacuta caiman chaiman manllanaita cuyuchijurca. Tucuicunami, huañugrinchi yarin ninajurca. Shinapash Pabloca nircami: Shuj angelmi cashna nihuarca, ‘Pablo ama manllaichu. Cesarpaman chayagrinapachami cangui. Cai barcopi rinajuj runacunapash tucuillami quishpiringa’ nishpa. Shinallata Pabloca nircami ama manllaichichu na huañugrinchichu nishpa.

Shina 14 punllacunata manllanaita huaira jatarishpa yacuta caiman chaiman cuyuchishca jipami Malta shuti islata carupi ricurca. Barco trancarishpa, faquirijpipash 276 gentecunaca tucuillami yacu manñaman chayarca. Huaquingunaca nadashpa, shujcunaca barco pedazocunapi huarcurishpami yacu manñaman chayarca. Chaipimi Malta shuti islamanda gentecuna paicunata cuidarca, cunuchunbash ninata japichirca.

Quimsa quilla jipami soldadocunaca Pablota shuj barcopi Roma llactaman aparca. Chaiman chayajpica huauquipanicunami chasquingapaj rirca. Paicunata ricushpaca Pabloca Diosta pagui nishpami, ninanda animarirca. Pablo preso cajpipash, shuj soldado cuidajpi shuj huasipi causachunmi saquirca. Ishcai huatacunatami chaipi yalirca. Gentecuna visitangapaj rijpica, Pabloca Diospa Reinomanda villachishpa, Jesusmandapashmi paicunamanga yachachin carca. Shinallata Pabloca Asia Menor, Judea llactapi huauquipanicunamanbashmi cartacunata escribirca. Imashinami ricunchi ali villaicunata shuj shuj llactacunapi villachichunga, Jehová Diosmi apóstol Pablotaca cacharca.