E Pavleskoro trito propovedničko patuvanje završingja ko Erusalim. Adari astargje le hem čhivgje le ko zatvor. Ki jekh vizija rakjate, o Isus vakergja leske: „Dža ko Rim hem propovedin adari“. E Pavle ingargje le taro Erusalim ki Cezareja, hem adari ačhilo duj berš ko zatvor. Keda sine ko sudo anglo o upraviteli o Fest, o Pavle vakergja: „Mangava te sudinel mange o cezar ko Rim“. O Fest odgovoringja leske: „Štom mangea te sudinel tuke o cezar, tegani ka dža ko cezar“. O vojnikija čhivgje e Pavle ko jekh brodi so džala sine ko Rim, hem lea sine panda duj hristijanja — o Luka hem o Aristarh.

Džikote panda sine ko brodi, ulo baro nevreme so trajngja but dive. Sarine mislingje kaj ka meren. Ama, o Pavle vakergja: „Manušalen, jekh angeli pojavingja pe mange ko suno hem vakergja mange: ’Ma dara Pavle, ka rese ko Rim. A ka ačhon dživde o javera da soj tuja ko brodi‘. Oven hrabra, nane te mera!“

O nevreme trajngja 14 dive. Palo adava, konečno pojavingja pe kopno. Adava sine o ostrov Malta. O brodi khuvgja ko brego taro kopno hem phagilo ko kotora. Ama, sa o 276 manuša so sine ko brodi resle ko brego, nesave plivingje a nesave astargje pe ko kotora taro brodi. O manuša tari Malta grižingje pe lenge hem thargje lenge jag te šaj te takjon.

Palo trin masekija, o vojnikija čhivgje e Pavle ko javer brodi so džala sine ko Rim. Keda reslja adari, o phralja ale te dikhen pe lea. Samo so dikhlja len, ov blagodaringja pe e Jehovaske hem ohrabringja pe. Iako sine phanlo, e Pavleske sine dozvolimo te živinel ko jekh kher kote so arakhela le sine jekh vojniko. Adari ačhilo duj berš. But manuša džana sine ki leste, hem ov vakerela lenge sine bašo e Devleskoro Carstvo hem sikavela len sine bašo Isus. Na samo adava, o Pavle pišingja pismija dži ko sobranija ki Mala Azija hem Judeja. Ov čače ispolningja i zadača so dengja la leske o Jehova — te vakerel o šukar haberi e manušenge taro but narodija.