O Pavle poklo trito misionarsko putovanje završindža ko Jerusalim. Odothe hine astardo hem čhivdo ko phanljipe. Ki vizija koja dobindža jekh rat, o Isus phendža ljese: „Tu ka dža ko Rim hem ka propovedine uduri.“ E Pavle kotar Jerusalim ljegardže ki Cezareja, kuri hine duj berš ko phanljipe. Ked hine ko suđenje anglo namesnik Fest, o Pavle phendža: „Mangava te sudini maje o car ko Rim.“ O Fest odgovorindža ljese: „Ako mangeja te sudini tuče o car, ko car hem ka dža.“ E Pavle čhivdže ko brodo kova dželo ko Rim, hem oljeja podžindže o Luka hem o Aristarh.

Ked hine ko more, hine jekh bari oluja, koja trajindža nekobor dive. Sarine mislindže so on ka meren. Ama, o Pavle phendža: „Manušaljen, jekh anđeo ko suno phendža maje: ’Pavle, ma dara. Tu ka dža ko Rim, hem sare ko akava brodo ka oven spasime‘. Ma obeshrabrinen tumen! Amen na ka mera.“

I oluja trajindža 14 dive. Ko krajo, dikhlje o kopno. Odova hine o ostrvo Malta. O brodo khuvdža ko brego ando kopno hem phadžilo ko kotora. Ama, sa o manuša ko brodo, a hine 276, reslje dži o kopno. Disave plivindže, a disave doljindže pe ko kotora ando brodo hem o pani igardža ljen dži o kopno. O manuša ko ostrvo Malta, brinindže pe oljendar hem thardže ljendže jag te šaj te tačon.

Palo trin masek, o vojnikija igardže e Pavle ko Rim avere brodoja. Ked reslo, o phralja alje te dikhen lje. Ked o Pavle dikhlja ljen zahvalindža pe e Jehovase hem but ohrabrisalo. Iako o Pavle hine phanlo, dozvolindže ljese te bešel ko jekh čher kuri arakhlja lje jekh vojniko. Odothe bešlja duj berš. O manuša avena hine te dikhen lje, a ov propovedindža ljendže ando e Devljeso Kraljevstvo hem sikavdža ljen ando Isus. Isto adžahar, o Pavle pisindža ljila e skupštinendže ki Mala Azija hem ki Judeja. O Jehova čače koristindža e Pavle te vačeri o šukar haberi bute narodondže.