До трито и послиднё разо о Павло жыля дур тэ росԥэнэн важ о Дэл, када сас андо Иерусалимо. Котэ лэс астардэ и стодэ андо баруно. И рят во диқля видения, андэ сави о Иисусо ԥэндя лэсти: «Ту жаса андо Римо и лэса котэ тэ росԥэнэс важ о Дэл». Тоди анда Иерусалимо лэ Павлос андярдэ андэ Кесария. Котэ во сас дуй бэрш андо баруно. По сындо о Павло ԥэндя лэ барэ манушэсти, савэс ақарэн Фесто: «Мэк ман сындой о царё андо Римо». О Фесто ԥэндя: «Камэс, кай тут тэ сындой о царё? Лэстэ и жаса». Лэ Павлос стодэ по кораблё, саво ладэлас андо Римо. Лэса слинэ дуй христианоря о Лука и о Аристархо.

Кала о кораблё сас пэ моря, вазгляпэ бари балвал. И балвал сас бут деса. Всаворэ, ко сас по кораблё гиндонас, кай мэрэна. Но о Павло ля тэ улэл лэ манушэн и ԥэндя лэнди: «Манди андо суно авеля о анӷело и ԥэндя „На дар, ту авэса андо Римо. И всаворэ, ко туса по кораблё, спасынапэ“. Важ када на даран! Амэ на мэраса».

И бари балвал сас 14 деса. И акэ уже дицол и ԥув. Када сас бэрэӷо Мальта. О кораблё дяпэдап андэ ԥув андэ моря и росԥаделя пэ котора. Но всаворэ 276 мануша, савэ слинэ по кораблё, доплавуисардэ каринг о бэрэӷо. Ко на ӷанэнас тэ плавуий, ритярдёнас пала ԥагэ котора анда кораблё. Кодэла, ко жувэнас пэ Мальта, фартэ драго прилинэ лэ манушэн па кораблё. Вонэ стодэ яг, кай всаворэ тэ татён.

Через трин шон лэ Павлос андярдэ андо Римо пэ авэр кораблё. Андо Римо лэса авелэ тэ диқэнпэ и ԥрала. Кала о Павло лэн додиқля, во сас фартэ радо и ԥэндя «наис» лэ Иеговасти. Хоть о Павло сас тала аресто, лэс мэклэ тэ жувэл андо цэр. Паша лэстэ вся время сас о воино, саво диқэлас пала лэстэ. О Павло сас котэ дуй бэрш. Каринг лэстэ авэнас мануша и во росԥэнэнас лэнди пала лэ Дэвлэско царство и сытярэлас лэн важ о Иисусо. Кадяжэ о Павло пистрояс письморя андэ собрании, савэ слинэ андэ Мало Азия и Иудея. Через о Павло и лащи весть уӷанглэ фартэ бут мануша анда разни народоря.