Na faaiʻuina le talaʻiga faataamilo lona tolu a Paulo i Ierusalema. O i inā na puʻea ai o ia ma tuuina i le falepuipui. I le pō, na ia vaaia ai se faaaliga lea na faapea mai ai Iesu iā te ia: ʻO le a e alu i Roma ma talaʻi ai i inā.’ Na aveese Paulo mai i Ierusalema ae ave i Kaisareia, lea na faafalepuipuiina ai mo le lua tausaga. Ina ua ia tulaʻi i le faamasinoga i luma o le kovana o Feso, na faapea atu Paulo: ʻIa faamasinoina aʻu e Kaisara i Roma.’ Na tali mai Feso: “Ona ua e tagi atu iā Kaisara; e te alu lava iā Kaisara.” Na tuu Paulo i se vaa e agaʻi atu i Roma, ma na latou ō faatasi ma uso Kerisiano e toʻalua o Luka ma Aritako.

A o latou iai i le sami, na agi ai se matagi malosi mo aso e tele. Na manatu tagata uma o le a latou feoti. Ae na faapea atu Paulo: ʻAlii e, na faapea mai se agelu iā te aʻu e ala i se miti: “Paulo e, aua e te fefe. E te taunuu lava i Roma, ma o le a saogalemu tagata uma o loo i luga o le vaa.” Ia lototetele! E tatou te lē feoti.’

E 14 aso na agi ai le matagi. Mulimuli ane ona latou iloa atu lea o le laueleele, o le motu o Melita. Ua tau le vaa i le faga oneone ma malepe ai, ae na taunuu lava ma le saogalemu i le motu tagata e toʻa 276 sa iai i luga o le vaa. O isi na feʻausi, a o isi na pipii i laupapa ma isi mea mai i le vaa ma ō ai i uta. Na tausia i latou e tagata Melita, ma tafu se afi ina ia latou maua ai le māfanafana.

I le tolu masina mulimuli ane, na ave ai e fitafita Paulo i Roma e ala i se isi vaa. Ina ua taunuu Paulo, na ō mai le ʻauuso e faafeiloaʻi o ia. Ina ua vaai atu Paulo iā i latou, ona ia lototele lea ma faafetai iā Ieova. E ui lava sa avea Paulo o se pagota, ae na faataga o ia e nofo i se fale mautotogi lea na leoleoina e se fitafita. E lua tausaga na nofo ai Paulo i lenā fale. Na ō atu tagata e vaai o ia, ma na ia talaʻi atu iā i latou e faatatau i le Malo o le Atua ma aʻoaʻoina i latou e faatatau iā Iesu. Na tusi atu foʻi Paulo i faapotopotoga i Asia Itiiti ma Iutaia. O le mea moni, na faaaogā e Ieova Paulo e faalauiloa atu le tala lelei i atunuu.