Pawula wagcina kushumayela eJerusalema lapho afike waboshwa khona. Ngalelinye lilanga ebusuku wabona umbono, futsi Jesu watsi kuye: ‘Utawuhamba uye eRoma uyoshumayela khona.’ Pawula wasuswa eJerusalema wayiswa eKhesariya lapho afike ahlala khona iminyaka lemibili. Ngesikhatsi atekiswa licala embikweMbusi Festusi, Pawula watsi: ‘Ngendlulisela licala kuKhesari.’ Festusi watsi: “Licala lakho ulendlulisele kuKhesari, ngaleso sizatfu utakuya kuye.” Pawula wagitjetwa umkhumbi loya eRoma futsi wahamba nebazalwane lababili, boLukha na-Aristakhusi.

Nabaselwandle, kwahhusha umoya lomkhulu, futsi watsatsa emalanga lamanyenti. Bantfu lebebakulomkhumbi bebacabanga kutsi batawufa. Kodvwa Pawula watsi: ‘Madvodza ingilosi ikhulume nami ephusheni yatsi: “Ungesabi Pawula. Wena utawufika eRoma, futsi Nkulunkulu utabasindzisa bonkhe laba lohamba nabo.” Banini nesibindzi ngobe angeke sife.’

Lahhusha emalanga langu-14. Njengobe bebahamba, sebatofika esichingini saseMaltha, lomkhumbi waphihlika waba ticucu, kodvwa bonkhe labantfu labangu-276 basindza. Bahlamba futsi lalabanye balandzela basebentisa emapulango neticucu temkhumbi baze bayewufika elugwini. Bantfu baseMaltha babaphatsa kahle kakhulu futsi babasela umlilo kuze batewufutfumala.

Ngemuva kwetinyanga letintsatfu, emasotja atsatsa Pawula amyisa eRoma. Nakefika bazalwane bamhlangabeta. Nakababona, Pawula wabonga Jehova, wase uba nesibindzi. Ngisho nobe Pawula abesiboshwa, wavunyelwa kutsi ahlale yedvwa agadvwe lisotja. Wahlala lapho iminyaka lemibili. Bantfu bebamvakashela futsi bekabafundzisa ngeMbuso waNkulunkulu nangaJesu. Pawula abebhalela emabandla ase-Asiya naseJudiya tincwadzi. Jehova wamsebentisa Pawula kutsi amemetele tindzaba letimnandzi etiveni.