Perjalanan utusan injil i Paulus katělune nasue su Yerusalem. Sene, i sie nisamẹ ku nipěnjara. Piạ su sěhěbị, i Yesus nẹ̌bisara si sie bọu penglihatan, ’I kau sarung makoạ sarang Roma, kụ měnginjilẹ̌ paị sene.’ Bọu ene, i Paulus niwawa bọu Yerusalem sarang Kaisarea kụ nipěnjara karěngụe dua taung. Su tempong niwawa sarang pengadilan, i Paulus nẹ̌bera si Gubernur Festus, ’Iạ mẹ̌dorong banding sarang Kaisarẹ̌ su Roma.’ I Festus nẹ̌bera, ’Ual᷊ingu i kau nẹ̌dorong banding sarang i Kaisarẹ̌, i kau sarung matamai sarang i Kaisarẹ̌.’ Bọu ene, i Paulus dingangu duang katau Sahani wal᷊inẹ, i Lukas dingangi Aristarkhus, niwawa sarang Roma něpakẹ kapal᷊ẹ̌.

Pira ěllo su laudẹ̌, anging maihạ timiụ. Kěbị taumata su kapal᷊ẹ̌ ene nẹ̌pikirẹ̌ i sire sarung mate. Katewe Paulus nẹ̌bera si sire, ’Su ral᷊ungu ipi sěmbaụ malaekatẹ̌ nẹ̌bera si siạ: ”Paulus, abe katakụ. I kau sarung mahumpạ su Roma, kụ kěbị taumata su kapal᷊ẹ̌ ini sarung masal᷊amatẹ̌.” Hakị u ene, abe katakụ! I kitẹ tawe mate.’

Anging turusẹ̌ timiụ karěngụe 14 su ěllone. Samurine, i sire nakasilo rul᷊unge. Ene kai Pulo Malta. Kapal᷊ẹ̌ ene nasil᷊adẹ̌ kụ nạběka, katewe 276 taumata su kapal᷊ẹ̌ ene kěbị nasal᷊amatẹ̌. Piạ u něhumbang su manga pěpal᷊u kapal᷊ẹ̌ dingangu piạ lai kimalang sarang wiwihu apeng. Taumata su Malta něngurusẹ̌ si sire, kụ někoạ putung tadeạu i sire botonge měndarang.

Tělu wul᷊ang tuhụe, manga prajurit nẹ̌bawa si Paulus sarang Roma dingangu kapal᷊ẹ̌ bal᷊inẹ. Su tempong i Paulus seng nahumpạ, anạu sěmbaụ sene nẹ̌sombang dingange. Su tempong nakasilo si sire, i Paulus nakitarimakasẹ si Yehuwa kụ i sie natoghasẹ̌. Maning nakoạ tahanan, Paulus botonge mẹ̌tanạ su wal᷊e nisewane. Katewe, piạ sěngkatau prajurit něndiagạ si sie. Dua taung i sie nẹ̌tanạ su wal᷊e ene. Taumata diměnta si sie, kụ i sie nẹ̌běke soal u Kararatuangu Mawu dingangu něněntiro soal i Yesus. Paulus lai němohẹ suratẹ̌ gunang manga sidang su Asia Kadodọ dingangu Yudea. Yehuwa kahěngang-hěngang něpakẹ si Paulus gunang měhabarẹ̌ habarẹ̌ mapia su kěbị bangsa.