Rí maʼni ajtsú aʼphu̱ rí Pablo ni̱jkha̱ gáʼtaraʼa niguámbóo náa Jerusalén. Ikhí nirtuwiin. Mbá mbruʼun, índo̱ ikhaa xtáa náa guʼwá e̱jua̱nʼ, Jesús niʼthúu̱n náa mbá visión: “Mi̱dxu̱ʼ náa Roma ga̱jma̱a̱ marataráʼa náa xuajen rúʼko̱”. Ikhú nigájnun ku̱ya̱a̱ Pablo náa Jerusalén mu magún náa Cesarea. Ikhí nixtáa a̱jma̱ tsiguʼ náa guʼwá e̱jua̱nʼ. Mbóo mbiʼi, índo̱ xtáa náa guʼwá ñajunʼ náa inuu Xa̱bu̱ Ñajunʼ Festo, Pablo nindo̱ʼo̱o̱: “Nandoʼ rí magumambánuu xkujndu ndrígóʼ náa César, bi̱ xtáa náa Roma”. Festo niriʼñuu: “Á mu nandaʼ rí César maʼnimbánuu xkujndu ndrígáʼ, makuʼmán mi̱dxu̱ʼ náa César”. Ikha jngó nitsimuu Pablo náa mbá barco rí na̱jkha̱ náa Roma. Ni̱jkha̱ gajmíi̱n a̱jmi̱i̱n cristianos: Lucas ga̱jma̱a̱ Aristarco.

Índo̱ kuwa náa lamáa nixkamin mbá ruʼwa mbiiʼ rí ndijyúuʼ mba̱yu̱ʼ mbiʼi. Xúgínʼ nikumu̱ún rí makhañún. Mú Pablo niʼthún: “Mbáa ángel niʼthúnʼ náa mbá xnuʼndaa: ‹Xámiñaʼ. Mi̱dxu̱ʼnú náa Roma, ga̱jma̱a̱ xúgínʼ bi̱ kuwa náa barco makáwíin›. Ikha jngó ¡xamíñala! Xákháñulúʼ”.

Nda̱wa̱á rí nimíniiʼ mbá 14 mbiʼi ga̱jma̱a̱ numuu ruʼwa mbiiʼ, asndu índo̱ ndiyáá ku̱ba̱ʼ. Malta mbá mbaaʼ rí gíwanʼ náa tapo̱o̱ iyaʼ. Barco niʼdu náa jui̱ʼi̱ ga̱jma̱a̱ niwiʼtájngaa, mú bi̱ 276 xa̱bu̱ bi̱ nagún ikhí niguánu májánʼ náa rawunʼ lamáa. Tikhun nini nadar ga̱jma̱a̱ eʼwíínʼ nigún tsu̱du̱u̱ mbá chíʼgíʼ xajpa ndrígóo barco. Xa̱bu̱ bi̱ kuwa náa Malta niñewu̱u̱n ga̱jma̱a̱ nigíʼ aguʼ mu matagúnʼ.

Ajtsú igu̱nʼ nda̱wa̱á, soldados nigún ku̱ya̱a̱ Pablo náa imbo̱o̱ barco rí na̱jkha̱ náa Roma. A̱ngiu̱lú nigún gundriguíi índo̱ ni̱jkha̱nú. Índo̱ Pablo ndiʼñún, nixnáa núma̱a̱ Jeobá ga̱jma̱a̱ rúʼko̱ nixnúu tsiakii. Maski ajndu Pablo nigida̱ʼ náa guʼwá e̱jua̱nʼ, niniñaaʼ maxtáa náa mbá guʼwá rí nitiʼñáá rí nañewu̱u̱n mbáa soldado. Ikhí nixtáa a̱jma̱ tsiguʼ. Xa̱bu̱ nagún ruyáá, ga̱jma̱a̱ ikhaa naʼtáruʼun ajngáa ndrígóo Reino ga̱jma̱a̱ naʼsngúún ga̱jma̱a̱ numuu Jesús. Pablo ma̱ngaa niʼnirámáʼ carta náa congregación dí rígá náa Asia Menor ga̱jma̱a̱ Judea. Nakujmaa kaʼwu rí Jeobá nijmiuu Pablo mu maʼga̱ kayóo ajngáa rí májánʼ rí na̱ʼkha̱ náa Dios mu mudxawíín xúgínʼ xa̱bu̱.