Paulu yange za kure zende na u pasen kwagh u sha kwa tar la ken Yerusalem. Yange i za kôr un ker, i wuhe ken purusu. Tsô Yesu lam a Paulu ken mpase u sha mnenge tugh, kaa a na ér: ‘U ngu yemen u za pase kwagh ken Roma.’ Tsô i mough a Paulu ken Yerusalem i yem a na ken Sesaria, za tsa her anyom ahar ken purusu. Yange gomna Fesetu ngur ôron Paulu ijir yô, Paulu kaa ér: ‘De me za Shisar a za ôrom ijir ken Roma.’ Fesetu gema kaa ér: “Ú za [a] ijir ne hen Shisar zee? Yô, ú za di hen Shisar je.” Yange i nyôr tso a Paulu, u yemen a na ken Roma. Anmgbianev mba ken Kristu mbagenev uhar, Luka man Aristareku, kpa lu yemen a na imôngo.

Mba ngur yemen ken zegemnger yô, ve za tagher a zegeuraahumbe. Ahumbe ne za ve iyol ayange imôngo. Hanma or shin tso la cii yange nan hen ér ka u nana kpe. Kpa Paulu kaa a ve ér: ‘Ne nomsombaiorov, ortyom ôr a mo ken mnya ér: “De cian ga, Paulu. U nyôr ken Roma kpee je, shi hanma or u nan lu shin tso ne vea we cii nana war.” Taver nen ishima! Se kpe ga.’

Yange uraahumbe la za hemen kuma ayange 14. Ken masejime yô, ve va hii u nengen a kpetar u icile i Melita. Ica i gbe ga yô, tso ve la hange shin inya, maa hembe abamber abamber. Kpa iorov 276 mba ve lu shin tso la cii nôngo due sha tar, ve war. Yange mbagenev ôô uwe, mbagen di kôr ave sha abamber a tsoo nôngo due sha tar. Tsô ior i Melita nenge sha a ve doo doo, shi keer ve usu, ve ôso.

Iwer itiar ngi karen yô, ushoja mbara nyôr a Paulu shin tso ugen, yem a na ken Roma. Za nyôron yô, anmgbianev va u va keghen un gbenda. Paulu nengen a ve yô, a sugh Yehova shi a zua a ishimataver. Shin er lu u Paulu una za lu ken purusu ken Roma nahan kpa, za nyer yô, i na u ian kôr haya hen ya ugen lu her, orshoja lu kuran un. Lu her anyom ahar. Ior lu va nengen a na, lu pasen ve kwagh u Tartor u Aôndo shi tesen ve kwagh u Yesu. Paulu shi nger uwashika kpishi hen iniongo i Kristu i ken Ashia u Kiriki man Yudia. Sha mimi yô, Yehova yange er tom a Paulu u samber a loho u dedoo ken ityar igen.