Lweendo lwatatu lwakukambauka lwa Paulo lwakamanina ku Jerusalemu. Okuya wakaangwa akuwaalilwa muntolongo. Mucilengaano masiku, Jesu wakamwaambila kuti: ‘Uyakuunka ku Roma kutegwa ukakambauke okuya.’ Paulo wakatolwa kuzwa ku Jerusalemu kuya ku Kaisareya kwalo nkwaakakkala muntolongo kwamyaka yobilo. Naakali kubetekwa kumbele lya Mweendelezi Fesito, Paulo wakaamba kuti: ‘Ndalomba kuti ndikabetekwe a Kaisara ku Roma.’ Fesito wakati: “Walomba kutola mulandu wako kuli Kaisara; kuli Kaisara nkotuunke.” Paulo wakabikkwa mubwato kaangidwe kuya ku Roma, mpoonya bakwesu bobilo Banakristo, Luka a Aristarko, bakaunka anguwe.

Kabali mulwizi, kwakatalika guwo pati, lyalo ilyakatola mazuba manji. Boonse bakali kuyeeya kuti balafwa. Pele Paulo wakabaambila kuti: ‘Nobaalumi, mungelo wandaambila muciloto kuti: “Utayoowi pe, Paulo. Uyakusika ku Roma, alimwi boonse ibali mubwato balafwutuka.” Amube basicamba! Tatukoofwa pe.’

Guwo lyakatola mazuba aali 14. Kumane, nyika yakalibonya. Yakali nsumbu ya Melita. Bwato bwakasimpa mumusenga akukwamauka, pele bantu boonse ibali 276 ibakali mubwato bakacikonzya kusika kunkomwe. Bamwi bakasaya mpoonya bamwi bakajatilila zibeela izyakakwamukide kubwato akuya kunkomwe. Bantu baku Melita bakabalanganya alimwi akubakunkila mulilo kutegwa bakasaalilwe.

Nokwakainda myezi yotatwe, basikalumamba bakabweza Paulo kuya ku Roma kubelesya bwato bumbi. Nobakasika, bakwesu bakaboola kuzoomucinga. Nobakamubona, Paulo wakalumba Jehova akuba sicamba. Nokuba kuti Paulo wakali mwaange, wakazumizyigwa kukkala muŋanda yakubbadelela kumwi kalindililwa asikalumamba. Wakakkala okuya kwamyaka yobilo. Bantu bakali kuboola kumubona, mpoonya wakabakambaukila kujatikizya Bwami bwa Leza alimwi wakabayiisya kujatikizya Jesu. Alimwi Paulo wakalemba magwalo kumbungano zyaku Asia Minor aku Judaya. Masimpe Jehova wakamubelesya Paulo kumwaya makani mabotu kumasi.