Lweendo lwaPawulu lwachitatu lwakukambawuka lwakamanina kuJerusalemu. Kali nkuko, wakasungwa akubikkwa muntolongo. Bumwi busiku, Pawulu wakabona chilengano chaJesu kali kumubuzya kuti: ‘Ulayinka kuRoma alimwi weelede kuyookambawukila nkuko.’ Kazwa kuJerusalemu, Pawulu wakatolwa kuKkayisareya, nkwaakakkala muntolongo kwaminyaka iibili. Naakali kubetekwa aMweendelezi Festo, Pawulu wakati: ‘Ndiyanda kuyoobetekwa aKkayisara.’ Festo wakati: “Walisisya kuli-Kaisara, ndazumina ulainka kuli-Kaisara.” Pawulu wakatanta bwaato bwakali kuya kuRoma abazyalwanyina babili, Lukka aAristarkko.

Nibakali mubwaato, kwakaba guwo pati lyakachitika kwamazuba miingi. Bantu boonse bakali mubwaato bakali kubonaanga balafwa. Mpawo Pawulu wakati: ‘Nibaalumi, mungelo wandibuzya kuti muchiloto: “Utayoowi, Pawulu, muyoosika kuRoma, bantu boonse mbuli aabo mubwaato tabakoofwa pe.” Mutayoowi tatukoofwa pe!’

Guwo eeli lyakatola mazuba ali 14. Mpawo, bakasika anyika njumu. Kakali kasuwa kategwa Melita. Bwaato bwakasimpa mumuse mpawo bwakapanduuka muzipaanzi-zipaanzi pesi bantu boonse bali 276 bakali mubwaato, teebakafwa pe. Bamwi bakayamba, bamwi bakajatilila azipaanzi zyabwaato kuti bakasike kunkomwe. Bantu bakuMelita bakabajata kabotu akukutula mulilo wakuyota.

Nikwakiinda myeezi itatu, basilumamba bakagazika Pawulu mubwaato bwakali kuya kuRoma. Naakasika nkuko, bazyalwanyina bakamutambula. Pawulu wakalumba Jehova akuba achibindi naakababona. Nikuba kuti Pawulu wakali musungwa, pesi wakali kuzumizigwa kukkala mung’anda iibbadalwa, kumwi kagadelwa asilumamba. Wakakkala nkuko kwaminyaka iibili. Bantu bakali kumuswaya alimwi bamwi wakali kubakambawukila atala aBwaami bwaLeza akubayiisya atala aJesu. Alubo, Pawulu wakalemba magwalo akumbungano zyakuAsiya Mayina akuJudaya. Eezi zitondeezya kuti Jehova wakabelesya Pawulu kuti akambawuke makani mabotu kumasena ali kule.