Ja yoxil sbʼejyel ja Pablo ja bʼa xcholjeli ti chʼak bʼa Jerusalén. Ti yamji tiw sok chʼikji preso. Jun akwal, yila jun nakʼsat sok ti aljiyabʼ yuja Jesús: «Oj wajan man Roma sok ti oja chol tiw». Anto aji eluk ja bʼa Jerusalén sok iji och bʼa Cesarea. Ti ajyi lutan chabʼ jabʼil tiw. Jun kʼakʼu, yajni wane xchapjel bʼa stiʼ sat ja gobyerno Festo, ja Pablo yala: «Wa xkʼana yeʼn ayilon ja César man Roma». Ja Festo sjakʼa: «Yujkʼa waxa kʼana yeʼn oj yila ja César, oj jeka man bʼay ja César». Ja yuj yawe kʼeʼuk ja Pablo bʼa jun barko wajum man Roma. Wajsok ja Lucas soka Aristarco.

Yajni teye bʼa yojol ja mari, yamjiye jun tsatsal xchawukil jaʼ bʼa albʼi jitsan kʼakʼu. Ja matik tey ja bʼa barko spensarane oj chamuke. Pe ja Pablo yala: «Winike, jun anjel yalakabʼ bʼa jun wayichal: ‹Pablo, mok xiwan. Ojni kʼotan ja bʼa Roma, sok yibʼanal ja matik teye ja bʼa barko ojni kanuke sakʼan›. Ja yuj, ¡mok xiwanik! Mi oj chamkotik».

Ja tsatsal xchawukil jaʼi albʼi 14 kʼakʼu. Tixa yilawe ja takin luʼum. Jani ja isla bʼa Malta. Ja barko kan tsʼapan sok chʼak jechuk, pe ja 276 matik teye bʼa barko chʼak kʼotuke sakʼan man stiʼ ja jaʼi. Jujuntik och sloke ja jaʼi sok tuk kayinajiye och soka steʼil ja barko. Talnajiye yuja swinkil ja Malta sok stsomowe jun kʼakʼ bʼa kʼatniye.

Oxe ixaw tsaʼan, ja kʼakʼanumiki yiʼaje och ja Pablo man Roma bʼa pilan barko. Yajni kʼoti, waj tajuk yuja smoj-aljeliki. Yajni yila, ja Pablo yayi tsʼakatal ja Dyos sok stsatsankʼujolan sbʼaj. Ama ja Pablo mi sijpaji, pe ajikan oj skʼul rentar jun naʼits bʼa talnubʼal yuj jun kʼakʼanum. Ti ajyi chabʼ jabʼil tiw. Ja ixuk winik wa xwaj yulataye, jaxa yeʼn wa xcholo yabʼ ja lekil rason sbʼaja sGobyerno ja Dyosi sok sjeʼa bʼa Jesús. Cha stsʼijbʼan kartaʼik sbʼaja kongregasyonik bʼa Asia Menor sok bʼa Judea. Ja Jyoba ya makunuk ja Pablo bʼa yijel och ja lekil rason bʼa Dyos ja bʼa chonabʼiki.