Akxni Pablo xlimakgtutu kilichuwinantapulilh Dios, maʼakgasputulh kJerusalén. Anta chipaka. Akgtum tsisni, akxni xwi kpulachin, Jesús tasiyanilh chu wanilh: “Napina kRoma chu nalichuwinana Dios kʼuma kachikin”. Pablo tamakxtuka kJerusalén chu linka kCesarea. Anta akgtiy kata tawilalh kpulachin. Akgtum kilhtamaku, akxni xwi ktribunal kxlakatin mapakgsina Festo, Pablo wa: “Klakaskin pi César nakintalakaxla kRoma”. Festo kgalhtilh: “Komo lakaskina pi César natalakaxlayan, nakmalakgachayan niku wi César”. Wa xlakata mawakaka Pablo kʼakgtum kbarco nema xʼama kRoma. Taʼankgolh chatiy kstalaninanin Cristo: Lucas chu Aristarco.

Akxni xwilakgo kpupunu, kalakgachiwililh lanka unisen nema akglhuwa kilhtamaku makgapalalh. Putum lakpuwankgolh pi xʼamakgo nikgo. Pero Pablo kawanilh: “Lakchixkuwin, chatum ángel kiwanilh kʼakgtum tamanixni: «Ni kapekuanti. Nachipina kRoma chu putum tiku wilakgo kbarco nalakgtaxtukgo». Wa xlakata ¡ni kapekuantit! Ni katiniw”.

Akxni xtitaxtunita 14 kilhtamaku la xkalakgachiwilinit unisen, akxilhkgolh pi xʼanan tiyat. Wa isla xla Malta. Barco talakgnutawi chu laktsu laktsu wa, pero 276 tiku anta xminkgo, tlan chinkgolh kxkilhtun. Makgapitsi paxtawakanankgolh chu amakgapitsi lichipaxnankgolh laktsu kiwi xla barco xlakata ni xtsankgakgolh kchuchut. Latamanin xalak Malta kakuentajtlawakgolh chu kawilinikgolh lhkuyat xlakata xtsitsiwankgolh.

Titaxtulh akgtutu papaʼ, soldados linkgolh Pablo kRoma kʼatanu barco. Natalan ankgolh makgamakglhtinankgo akxni chaʼalh. Akxni kaʼakxilhli, Pablo paxtikatsinilh Dios chu tlan makgkatsilh. Maski Pablo tachin xwi, maxkika talakaskin xrentarlilh akgtum chiki niku xkuentajtlawama chatum soldado. Anta tawilalh akgtiy kata. Latamanin xʼankgo lakgapaxialhnankgo chu xla xkalitachuwinan tamakatsin xla xTamapakgsin Dios chu xkamasiyani xlakata Jesús. Pablo na katsokgnanilh cartas congregaciones xalak Asia Menor chu xalak Judea. Liwana litasiya pi Jehová maklakaskilh Pablo xlakata xkalinilh xalakwan tamakatsin xla Dios kachikinin.