Namba 3 raun bilong Pol long autim tok i pinis long Jerusalem. Na long dispela hap, ol i arestim em na putim em long kalabus. Long wanpela visen long nait, Jisas i tokim em: ‘Yu bai go long Rom na autim tok long hap.’ Ol i kisim Pol long Jerusalem i go long Sisaria na em i stap 2-pela yia long kalabus. Taim Pol i sanap long kot long ai bilong Gavana Festus, Pol i tok: ‘Mi laik bai Sisar long Rom i mekim kot bilong mi.’ Orait Festus i tok: “Yu apil pinis long Sisar, olsem na bai yu go long Sisar.” Ol i putim Pol long wanpela sip i laik go long Rom, na tupela brata Kristen, Luk na Aristarkus, i go wantaim em.

Taim ol i stap long solwara, strongpela win i kirap, na win i strong inap planti de. Olgeta man i ting ol bai dai. Tasol Pol i tok: ‘Ol man, long driman wanpela ensel i tokim mi: “Pol, yu no ken pret. Yu bai go long Rom, na olgeta man i stap wantaim yu long sip ol bai seif.” Yupela no ken pret! Yumi no inap dai.’

Dispela strongpela win i ron inap 14 de. Nau, ol inap lukim ples. Em ailan Malta. Sip i go pas long wesan na bruk i go liklik, tasol 276 man i stap long sip ol i swim i go long nambis. Sampela i swim na ol narapela i holim hap plang bilong sip na swim i go long nambis. Ol manmeri bilong Malta i kisim ol na wokim paia bilong ol dispela man i ken hatim skin.

Tripela mun bihain, ol soldia i kisim Pol long narapela sip i go long Rom. Taim em i kamap, ol brata i kam bungim em. Taim Pol i lukim ol, em i tenkyu long Jehova na kisim strong. Maski Pol i kalabusman, ol i larim em i stap long wanpela rent haus na wanpela soldia i was long em. Em i stap long dispela haus inap 2-pela yia. Taim ol man i kam lukim em, em i save autim tok long ol long Kingdom Bilong God na skulim ol long Jisas. Na tu, Pol i raitim ol pas i go long ol kongrigesen long Esia Maina na Judia. Tru tumas, Jehova i yusim Pol long autim gutnius long ol man bilong olgeta lain.