Pawulo u gimete riendzo rakwe ra vunharhu ro chumayela eYerusalema. Loko a ri kwalaho u khomiwile a pfaleriwa ekhotsweni. Siku rin’wana nivusiku, Yesu u n’wi byele leswi exivonweni: ‘U ta ya eRhoma leswaku u ya chumayela kona.’ Pawulo u susiwe eYerusalema a yisiwa eKhezariya, laha a heteke malembe mambirhi ekhotsweni. Loko a ri karhi a tengisiwa emahlweni ka Ndhunankulu Festo, Pawulo u te: ‘Ndzi pfumeleleni leswaku ndzi ya avanyisiwa hi Khezari eRhoma.’ Festo u te: “U kombele ku avanyisiwa hi Khezari; kutani u ta ya eka Khezari.” Pawulo u khandziyisiwe xikepe xo ya eRhoma naswona u fambe ni vamakwerhu vambirhi, ku nga Luka na Aristako.

Elwandle ku ve ni xidzedze xa matimba lexi tekeke masiku yo tala. Hinkwavo a va ehleketa leswaku va ta fa. Kambe Pawulo u te: ‘Vavanuna, ntsumi yi ndzi byerile enorhweni yi ku: “U nga chavi Pawulo. U ta fika eRhoma naswona hinkwavo lava nga na wena exikepeni va ta pona.” Vanani ni xivindzi! A hi nge fi.’

Xidzedze xi hete masiku ya 14. Eku heteleleni, va vone tiko. A ku ri xihlala xa Melita. Xikepe xi mbombomerile kutani xi tshoveka xi va swiphemuphemu, kambe vanhu va 276 lava a va ri eka xona va ponile. Van’wana va hlamberile kasi van’wana va khomelele eka swiphemu swa xikepe va ya eribuweni. Vanhu va le Melita va va khathalerile naswona va tshivele ndzilo leswaku va ta tikufumeta.

Endzhaku ka tin’hweti tinharhu, masocha ma teke Pawulo ma n’wi yisa eRhoma hi xikepe xin’wana. Loko a fika, vamakwerhu va tile va ta n’wi hlanganisa. Loko Pawulo a va vona, u khense Yehovha a tlhela a va ni xivindzi. Hambileswi Pawulo a a khomiwile, a a pfumeleriwa ku tshama endlwini leyi hirhiweke laha a a rindziwa hi socha. U tshame kwalaho ku ringana malembe mambirhi. Loko vanhu va n’wi endzela, a a va chumayela hi Mfumo wa Xikwembu a tlhela a va dyondzisa hi Yesu. Pawulo u tlhele a tsalela mavandlha ya le Asia Minor na Yudiya mapapila. Hakunene Yehovha u tirhise Pawulo leswaku a chumayela mahungu lamanene ematikweni yo hambanahambana.