A cikhati leci Pawule a nga endza hi khati ga wunharu, a liendzo lakwe li mbhelele Jerusalema. Loku a hi seyo, i no khon’wa a vhalelwa paxweni. Jesu i no woneka ka Pawule hi muwoniso ni wusiku, a mu byela lezvi: ‘U taya le Roma u ya chumayela kona.’ Va no susa Pawule le Jerusalema va mu yisa le Khesariya, lomu a nga ya tshama malembe mambiri lomu paxweni. A cikhati leci a nga kari a xuxisiwa mahlweni ka Hosi Festu, i te: ‘Ndzi rumeleni le Roma ndzi ya xuxisiwa hi Khezari.’ Festu aku: ‘U kombele kuya ka Khezari, hi ta ku rumela ka ye’ Khezari.’ Va no teka Pawule hi ngalava va mu yisa le Roma. I no famba ni vamakabye vambiri va maKristu, Luka na Aristarkusi.

Loku va kari va famba lomu bimbini, ku noba moya wa hombe nguvhu hi masiku yo tala. Vontlhe va wa alakanya lezvaku va tafa. Kanilezvi, Pawule i no va byela lezvi: ‘Vavanuna, ndzi lorile a ngilozi yo kari na yi ndzi byela lezvi: “U nga chavi Pawule. U ta chikela le Roma. Vontlhe va nga lomu ngalaveni va ta chikela na va ha hanya”. Hikwalaho, mu nga chavi. Hi nga tafa’!

A moya lowo wa hombe wu noba hi 14 wa masiku. Hi kugumesa, va no wona misava. Gi wa hi tiko ga Melita, gi nga hi cikari ka mati. A ngalava yi no yaba misava zvonake yi pandzeka. Kanilezvi, vontlhe va 276 va nga hi lomu ngalaveni a va fangi. A vokari va no hlambela kala lehandle, a van’wani va no famba hi lehehla ka tibakwa ta ngalava. A vanhu va le Melita va no va hlayisa va tlhela va dzivela ndzilo kasi va wora.

Loku ku hundzile tihweti tinharu, a masochwa ma no teka Pawule ma famba naye le Roma hi ngalava yin’wani. Loku va chikele, a vamakabye va nota va ta tlhangana naye. A cikhati leci Pawule a nga va wona, i no bonga Jehovha a tiya hlana. Hambu lezvi Pawule a nga hi cibochwa, va mu tsikile a lugara yindlu a tshama ka yona na a gadhiwa hi musochwa wo kari. I mbhetile malembe mambiri na a tshama laho. Ku wata vanhu va ta mu wona a se va chumayela hi Mufumo wa Nungungulu a tlhela a va gondzisa xungetano hi Jesu. Pawule i tlhelile a tsala mapapilo maya ka mabandla yo kari ma nga hi le tikweni ga Aziya wa Mutsongwani ni le Judhiya. Zva woneka khwatsi lezvaku hakunene Jehovha i tirisile Pawule kasi ku hangalasa mahungu yo saseka ka vanhu va matiko man’wani.