Павелдиң үшкү аян-чоруу Иерусалимге төнген. Аңаа ону туткаш, кара-бажыңнап каан. Дүне көстүүшкүнге Иисустуң: «Сен ам Римче баргаш, аңаа суртаалдаар сен» — дээнин ол дыңнаан. Павелди Иерусалимден Кесарияже аппаарга, ол аңаа ийи чыл кара-бажыңга олурган. Павел судка Фест дээр чагырыкчыга: «Мени Римде император шиитсин» — дээн. Фест аңаа: «Императорнуң шииткелин күзеп турар болзуңза, ынаар чоруур сен» — деп харыылаан. Павелди Рим баар корабльга олуртупкан. Ооң-биле кады Лука биле Аристарх дээр акылар чораан.

Олар далайга улуг хат-шуурганга таварышкан. Ол шуурган элээн каш хонук ишти уламчылап келген. Ынчангаш улус: «Өлүп каар бис!» деп бодап турган. Ынчан Павел оларга: «Дүжүмде ангел көзүлгеш: “Кортпа, Павел. Римге чедип алыр сен, корабльда шупту улус дириг артар” — диди. Ынчангаш дүвүревеңер, бис өлбес бис» — дээн.

Шуурган 14 хонук киткээн соонда, ам-на чер көстүп келген. Ол Мальта деп ортулук болган. Корабль сыык черге кадалы бээрге, артыы талазын күштүг чалгыглар буза шаап эгелээн. Ынчалзажок аңаа чораан 276 кижи эрикче онча-менди чеде берген. Эштип билбес улус корабльдың бузундуларындан туттунуп алгаш, эрикче салдап четкен. А Мальтаның чурттакчылары оларны чылыг-чымчак уткуп ап, чынныр кылдыр одаг салып берген.

Үш ай эрткенде, Павелди Римче өске корабльга аппарган. Римге ону акы-угбалар уткуп алган. Оларны көргеш, Павел аажок өөрүп, Иеговага четтиргенин илередип турган. Павел хоругдаттырган-даа болза, бажың хөлезилеп алыр аргалыг болган. Ооң чанынга кезээде ону хайгаараар дайынчы турган. Павел аңаа ийи чыл болган. Улус аңаа кээрге, Бурганның Чагыргазының дугайында суртаалдап, Иисустуң дугайында өөредип турган. Оон ыңай Павел Бичии Асияда база Иудеяда чыыштарга чагаалар бижээн. Павелдиң ачызында буянныг медээни өске чоннардан хөй улус билип алган.