Lwendo lwa vhuraru lwa u huwelela lwa Paulo lwo guma Yerusalema. Musi e henengei o farwa nahone a valelwa dzhele. Yesu o amba nae kha bono vhusiku a ri: ‘Iyani Roma nahone ni huwelela henefho.’ Paulo o bviswa Yerusalema a iswa Kesarea, he a fhedza miṅwaha mivhili e dzhele. Musi a tshi khou sengiswa phanḓa ha Muvhusi Festo, Paulo o ri: ‘Kha ndi haṱulwe nga Kesare, ngei Roma.’ Festo a ri: “No ri hoyu mulandu u fhiriselwe ha Kesare; u ḓo fhiriselwa ha Kesare.” Paulo a dzheniswa tshikepeni tshi yaho Roma nahone Luka na Aristariko, vhahawe vhavhili vha tshinnani vha ṱuwa nae.

Musi vhe lwanzheni, ha vha na ḓumbu ḽihulu, ḽe ḽa bvela phanḓa lwa maḓuvha manzhi. Vhoṱhe vho vha vha tshi humbula uri vha ḓo fa. Fhedzi Paulo a ri: ‘Vhanna, muruṅwa o amba na nṋe muḽoroni a ri: “Paulo, ni songo ofha. Ni ḓo swika Roma, nahone muṅwe na muṅwe a re kha tshikepe na inwi u ḓo tsireledzea.” Ni songo ofha! Ri nga si fe.’

Ḽeneḽo ḓumbu ḽo vhudzula maḓuvha a 14. Hu si kale vha vho kona u vhona shango. Ho vha hu tshiṱangadzime tsha Melite. Tshikepe tsha thula philiphili tsha pwashekana, fhedzi vhathu vhoṱhe vha 276 vhe vha vha vhe tshikepeni vha swika vho tsireledzea. Vhaṅwe vho tou bammbela, vhaṅwe vha papamala nṱha ha zwipiḓa zwa tshikepe u swika philiphilini. Vhathu vha Melite vho vha ṱhogomela nahone vha vha vhasela mulilo uri vha dudelwe.

Nga murahu ha miṅwedzi miraru, maswole a isa Paulo Roma nga tshiṅwe tshikepe. Musi a tshi swika, vhahashu vha ḓa vha mu ṱanganedza. Musi a tshi vha vhona, Paulo a livhuwa Yehova nahone a vha na tshivhindi. Naho Paulo o vha o fariwa, o tendelwa u dzula nḓuni yo hirwaho o lindwa nga swole. O dzula henefho miṅwaha mivhili. Musi vhathu vha tshi ḓa u mu vhona, o vha a tshi huwelela khavho nga ha Muvhuso wa Mudzimu nahone a tshi vha funza nga ha Yesu. Paulo o dovha a ṅwalela zwivhidzo zwa Asia Minor na Yudea marifhi. Vhukuma, Yehova o shumisa Paulo u phaḓaladza mafhungo maḓifha kha dzitshakha.