Ta Jerosalema nitoriany Paoly farany, tamy dia fahatelo nataony. Nisamborindro izy tan̈y, baka io nigadraindro. Koa fa alin̈y andra, izy nahita fahitan̈a, ke taminio Jesosy nivolan̈a taminany: ‘Anao io handeha a Roma. An̈y tany hitorianao.’ Paoly nindesin̈y ta Kaisaria, ke taon̈o aroe izy nigadra tan̈y. Izy koa fa nitsarainy Festosy Governera, izy nivolan̈a: ‘Zaho mangataka Kaisara hitsara zaho a Roma an̈y.’ Ho Festosy: ‘Anao nangataka Kaisara hitsara anao, ke anao alefa amy Kaisara an̈y.’ Iro nangala sambo nandeha ta Roma. Nisy Kristianin̈y aroe niaraka taminany: Aristarko ndreky Lioka.

Nisy tsiko mare tamy ranomasin̈y, tan̈atiny andra maromaro. Olo jiaby tao tsisy nan̈anten̈a mbala ho velon̈o. Ho Paoly tamindro: ‘Nisy anjely nikoran̈a taminaka tamy zaho nan̈inofy. Nivolan̈iny: “Paoly, aza mavozo. Ho tody a Roma fo anao. Anaro jiaby an̈aty sambo ao tsisy hofoaty nata araiky.” Ke anaro aza mavozo, fa atsika tsy maty zen̈y.’

Efa 14 andra nisiany tsiko mare be in̈y. Farany iro nahatazan̈a tanàna. Nosy Malta izio. Sambo in̈y kon̈o tamy jia ke vakivaky, fa iro olo 276 tan̈atinizio ndraiky tsy naty. Sasany nilomon̈o, fa sasany ndraiky nangala tapatapaka kakazo tamy sambo robaka in̈y nisangavitandro firaka tantety. Iro olo ta Malta tao nitsena iro ndreky nan̈ano motro namindroandro.

Nafaka telo fanjava, iro maramila aby io nitondra Paoly nandeha ta Roma. Nandeha sambo hafa iro. Nisy rahalahy maromaro nitsena Paoly tan̈y. Ravoravo izy nahita iro, ke nan̈ano mersy Jehovah. Nahainahery fo izy. Paoly ndray nigadra, izy nimboandro nan̈ofa tran̈o, fa nisy maramila fo niambin̈y izy. Taon̈o aroe izy tan̈y. Naro olo namangy izy, ke izy nitory tamindro momba Fanjakan̈any Zan̈ahary, ndreky nampianatra iro momba Jesosy. Izy koa nanoratra taratasy nandeha tamy fiangonan̈a ta Azia Minora ndreky Jodia. Jehovah ankitin̈y nampiasa Paoly nahavitany nitory vaovao tsara io tamy firenena jiaby.