Ulendo watatu wakulalicila wa Paulo wamalile ku Yelusalemu. Ali ku Yelusalemuko, jwakamulidwe ni kuŵicidwa m’nyumba ja ukayidi. Nambo cilo, jwalakwe ŵagaweni mesomkulola. M’mesomkulolago, Yesu ŵamsalile jwalakwe kuti, ‘Cimcijawula ku Loma, ni cimcilalicila kweleko.’ Paulo ŵajigalidwe kutyocela ku Yelusalemu kwawula ku Kaisaleya. Kweleko ŵatemi yaka yiŵili mu ukayidi. Paŵaliji mkwimbigwa magambo ni Jwakulamulila Fesito, Paulo jwatite, ‘Mwenye jwa ku Loma ni jucakalamule magambo gangu.’ Ni Fesito ŵatite, “Pakuŵa mtesile apilo kwa Mwenye jwa ku Loma, cimjawule kwa Mwenye jwa ku Loma.” Paulo ŵamkwesisye sitima ja pamesi jajajawulaga ku Loma. Jwalakwe jwaliji yalumo ni abale ŵaŵili ŵaciklistu ŵaŵaliji Luka ni Alisitako.

Nambo jemanjaji ŵalasile ni cimbungo camacili, cacapujile kwa masiku gejinji panyasapo. Jwalijose mu sitimamo jwaganisyaga kuti cawe. Nambo Paulo ŵasalile kuti, ‘Acimjangu, lilayika lisalile une kupitila musagamisi kuti, “Mkatenda woga Paulo. Cimkayice ku Loma, soni jwalijose jwali m’sitimaji ngawa.” Alimbe mtima! Ngatuwa.’

Cimbungoco casawisye kwa masiku 14. Nambo pambesi pakwe, mkuli watandite kuwoneka. Caliji cilumba ca Malita. Sitimajo jagundile pasi ni jakasicekasice. Nambo ŵandu wosope ŵakwana 276 ŵakulupwice. Ŵane mwa ŵanduŵa ŵang’ambilaga, ŵane ŵakamwile mapisi ga sitima gagajejeŵalaga mpaka kumkuli. Ŵandu ŵa pa cilumba ca Malita ŵakamucisye jemanjaji soni ŵakolesisye moto kuti ŵanduwo ajote.

Pali pamasile miyesi jitatu, asilikali ŵamkwesisye Paulo sitima jine jajajawulaga ku Loma. Ali ayice, abale ŵayice kukumlola Paulo. Paulo paŵagambile kwawona abalewo, jwam’yamicile Yehofa soni jwalimbile mtima. Atamose kuti Paulo jwaliji mkayidi, jwalakwe jwatamaga m’nyumba ja lendi, kwele msilikali ŵamlondelaga. Jwalakwe jwatemi m’nyumbaji kwa yaka yiŵili. Ŵandu ŵayikaga kukumlola, soni ŵaliji mkwalalicila ŵanduwo yakwamba Ucimwene wa Mlungu soni kwajiganya ya Yesu. Paulo jwalembelaga yikalata ku mipingo ja mu Asia Minor soni ja ku Yudeya. Kusala yisyene, Yehofa ŵamkamulicisye masengo Paulo kuwandisya utenga wambone m’yilambo yine.