Polo wumanina kulonga mu vyazi yintatu ku Yelusalemi ayi kuawu bankangila ayi bantulila mu buloku. Va bwilu bumweka, Yesu wumonikina Polo mu ndosi, ayi wunkamba: ‘Ngye fweti kwenda ku Loma mwingi walonga.’ Polo bambotula ku Yelusalemi ayi bannata ku Sezali, kuawu kamanina mimvu myodi mu buloku. Mu thangu baba kumfundisi kwidi mfumu Festo, Polo wisa tuba: ‘Minu yitidi bamfundisila kwidi Kaisali ku Loma.’ Festo wutuba: ‘Kwidi Kaisali ma linda, kuawu wunkwenda.’ Polo bankandika mu dikumba diba kwenda ku Loma ayi zikhomba wadi bayenda yandi Luka ayi Alistalako.

Bo baba kyenda, badengana kivuka ki ngolo kivanga bilumbi biwombo. Baboso baba mu dikumbi bazaba kuawu ti bammana kufwa. Vayi Polo wuba kindisa: ‘ Bikanu kumona boma, kibila mbasi yi Yave be kumbonikina mu ndosi ayi be kukhamba: “Bika kumona boma Polo. Ngyeu wala tuka ku Loma, ayi batu boso badi mu dikumbi, ni wumweka kalendi fwa ko.” Diawu kindamanu ka twisi mfwa ko!’

Kivuka beni kidukisa 14 di bilumbu. Bosi batona kumona zungu ki ntoto baba tanguninanga Maliti. Ava batuka ku disimu, dikumbi ditabuka va khati, ayi 276 di batu baba muna, banka batona kusyuka, bankaka basadila bitini bi mabaya mwingi kuvitila ku disimu. Thangu baboso batuka va disimu, basi Maliti baba tambula buboti ayi baba vangila mbazu mwingi bayota.

Zingonda zi tatu zivyoka, masodi banata Polo ku Loma mu dikumbi dinkaka. Thangu Polo katuka kuna, zikhomba bantambula buboti. Bo Polo kamona zikhomba, nandi wuvutula matondo kwidi Yave ayi wubwela kukindama. Buloku bu Polo diswasana buba. Nandi wube kalanga ku nzo yi kufutila vayi, bamvana disodi diba kunlunganga ayi wukala ku nzo beni mimvu myodi. Bo batu babe kwedanga kambila, nandi wuba kuba longanga matedi Kintinu ki Nzambi ayi matedi Yesu. Polo mvandi wusonika minkanda kafila mu bimvuka biba ku Azia ayi ku Yuda. Bukyedika, Yave wusadila Polo mwingi kanata zitsangu zimboti mu zitsi ziwombo.